ہارورڈ یونیورسٹی کو ٹرمپ کی ایک اور دھمکی
امریکی صدر ٹرمپ نے فلسطین دشمنی میں ہاروڈ یونیورسٹی کے خلاف ایک اور اقدام کا اعلان کردیا ہے۔
سحرنیوز/دنیا: ڈونلڈ ٹرمپ نے سوشل میڈیا ویب سائٹ ٹروتھ پر اپنی ایک پوسٹ میں دھمکی دیتے ہوئے لکھا کہ اگر ہارورڈ یونیورسٹی کی انتظامیہ ادارہ چلانے کے انداز کو تبدیل کرنے کے مطالبات کو نہیں مانتی تو یونیورسٹی کو ٹیکس سے مستثنیٰ حیثیت سے محروم کر دیا جائے گا۔ ٹرمپ انتظامیہ فلسطینیوں کے حامی طلبہ کی کولمبیا یونیورسٹی سے شروع ہونے والی احتجاجی تحریک کو روکنے کے لیے ملک بھر کی یونیورسٹیوں پر دباؤ ڈال رہی ہے۔
واضح رہے کہ ڈونلڈ ٹرمپ نے فلسطینیوں کے حامی طلبہ کے مظاہروں کو امریکا مخالف اور یہودی مخالف قرار دیا ہے اور ان تمام یونیوروسٹیوں کے وفاقی فنڈز منجمد کر دیے ہیں جنہوں نے ٹرمپ انتظامیہ کے مطالبات ماننے سے انکار کیا۔
ہارورڈ یونیورسٹی کے صدرایلن گاربر نے ڈونلڈ ٹرمپ کے مطالبات کو غیر قانونی قرار دے دیا ہے اور کہا ہے کہ یونیورسٹی اپنی آزادی یا اپنے آئینی حقوق پر ہرگز سمجھوتہ نہیں کرے گی۔
