SAHAR

پاکستان کے وزیراعظم شہباز شریف 2 روزہ سرکاری دورے پر آذربائیجان روانہ ہوگئے ہیں۔ ان کے ساتھ ایک اعلیٰ سطحی وفد بھی آذربائیجان گیا ہے، جس میں وفاقی وزرا اسحاق ڈار اور عطا تارڑ بھی شامل ہیں۔

 سحرنیوز/پاکستان: پاکستان کی سرکاری خبر رساں ایجنسی اے پی پی کے مطابق وزیر اعظم شہباز شریف آذربائیجان کے صدر الہام علی اوف کی دعوت پر آذربائیجان کے دورے پر گئے ہیں وہ آذربائیجان کے یومِ فتح کی پانچویں سالگرہ کی تقریبات میں شرکت کریں گے۔

 ایک اعلیٰ سطحی وفد بھی شہباز شریف کے ساتھ گیا ہے جس میں نائب وزیر اعظم اور وزیر خارجہ اسحاق ڈار اور وزیر اطلاعات و نشریات عطا تارڑ بھی شامل ہیں۔

شہباز شریف اس دورے کے دوران آذربائيجان کے صدر الہام علی اوف سے ملاقات بھی کریں گے، جس میں دوطرفہ تعلقات کے تمام پہلوؤں کا جائزہ لیا جائے گا اور تجارت و سرمایہ کاری، توانائی، دفاع، تعلیم اور علاقائی تعلقات سمیت مختلف شعبوں میں تعاون کو مزید فروغ دینے کے نئے امکانات پر بات چیت ہوگی۔

پاکستانی میڈیا رپورٹوں کے مطابق شہباز شریف کا یہ دورہ آذربائیجان کی خودمختاری اور علاقائی سالمیت کے لیے پاکستان کی غیر متزلزل حمایت کے اعادے اور دونوں برادر ممالک کے درمیان اسٹریٹیجک شراکت داری کو مزید مضبوط کرنے کا باعث بنے گا۔