روہنگیا مسلمانوں کے لئے رہبر انقلاب اسلامی کی امداد
Oct ۱۷, ۲۰۱۷ ۱۹:۴۴ Asia/Tehran
روہنگیا مسلمانوں کی صورتحال کے بارے میں ایران کی ہلال احمر سوسائٹی کے سربراہ اور اس ادارے میں رہبر انقلاب اسلامی کے نمائندے کے خط کے بعد آیت اللہ العظمی سید علی خامنہ ای نے روہنگیا مسلمانوں کے لیے دس ارب ریال کی رقم مختص کرنے کا حکم دیا ہے۔
ہلال احمر سوسائٹی کے سربراہ اور اس ادارے میں رہبر انقلاب اسلامی کے نمائندے کے خط میں روہنگیا مسلمانوں کی حالت زار اور ان اقدامات کی رپورٹ پیش کی گئی تھی جو ایران کی ہلال احمر روہنگیا پناہ گزینوں کے لیے انجام دے رہی ہے۔
اعداد و شمار کے مطابق مغربی میانمار کے صوبے راخین میں روہنگیا مسلمانوں پر فوج اور انتہا پسند بدھسٹوں کے حملوں میں چھے ہزار سے زیادہ مسلمان جاں بحق اور آٹھ ہزار سے زیادہ زخمی ہوئے ہیں جبکہ پانچ لاکھ سے زیادہ روہنگیا مسلمان بنگلہ دیش میں پناہ لینے پر مجبور ہو گئے ہیں۔