طالبان مذاکرات کی میز پر
افغان طالبان نے افغانستان کے لیے امریکا کے خصوصی مندوب زلمے خلیل زاد سے قطر میں ملاقات کی ہے۔
غیرملکی خبررساں ادارے رائٹرز کی رپورٹ کے مطابق طالبان اورامریکی حکام کی ملاقات کی طالبان کے ترجمان ذبیح اللہ مجاہد نے تصدیق کردی ہے، اور اس بارے میں جاری کردہ اپنے ایک بیان میں کہا ہے کہ طالبان رہنماؤں اور امریکی اہلکاروں کے مابین مذاکرات قطر میں شروع ہو گئے ہیں۔ قطر میں ہونے والی اس ملاقات کے حوالے سے فی الحال زیادہ تفصیلات سامنے نہیں آئی ہیں۔ تاہم کہا جا رہا ہے کہ پاکستان نے مذاکرات شروع کرانے میں اہم کردار ادا کیا ہے۔
واضح رہے کہ افغانستان میں گزشتہ 17 برس سے جاری جنگ کے خاتمے اور قیام امن کے لیے مذاکراتی عمل گزشتہ چند دنوں سے اختلافات کے سبب تعطلی کا شکار رہا ہے اور گزشتہ ہفتے کے اختتام پر ہی طالبان نے افغانستان کے لیے خصوصی مندوب زلمے خلیل زاد سے پاکستان میں ملاقات کرنے سے انکار کرتے ہوئے کہا تھا کہ ہم کابل حکومت کے نمائندوں کے ساتھ مذاکرات پر قطعی طور پر راضی نہیں۔
