پاکستان کے وزیر اعظم پارلیمنٹ حملہ کیس میں بری
Oct ۲۹, ۲۰۲۰ ۱۳:۵۰ Asia/Tehran
پاکستان میں انسداد دہشت گردی کی عدالت نے پارلیمنٹ حملہ کیس میں وزیر اعظم عمران خان کو بری کر دیا ہے۔
پاکستانی میڈیا کے مطابق اسلام آباد کی انسداد دہشت گردی عدالت کے جج راجہ جواد عباس نے پارلیمنٹ حملہ کیس میں آج محفوظ فیصلہ سناتے ہوئے اس ملک کے وزیر اعظم عمران خان کی بریت کی درخواست منظور کر لی تاہم کیس کے دیگر ملزموں پر 12 نومبر کو فرد جرم عائد کی جائے گی۔
2014 میں پاکستان تحریک انصاف (پی ٹی آئی) اور پاکستان عوامی تحریک (پی اے ٹی) کے دھرنے کے دوران مشتعل افراد نے پی ٹی وی کے ہیڈ کوارٹر پر دھاوا بولا تھا۔ عمران خان اور ڈاکٹر طاہر القادری سمیت کم و بیش 70 افراد کے خلاف تھانہ سیکریٹریٹ میں پارلیمنٹ ہاؤس، پی ٹی وی اور سرکاری املاک پر حملوں اور کار سرکار میں مداخلت کے الزامات کے تحت مقدمہ درج کیا گیا تھا۔
