یورپ ایٹمی معاہدے کے تحت شفاف اقدامات انجام دے، روس کا مطالبہ
روس کے وزیر خارجہ نے یورپی ممالک کی جانب سے ایٹمی معاہدے کے بارے میں شفاف اقدامات کی انجام دہی پر زور دیا ہے۔
اپنے جرمن ہم منصب ہیکو ماس کے ساتھ ملاقات کے بعد صحافیوں سے بات چیت کرتے ہوئے سرگئی لاوروف کا کہنا تھا کہ ایٹمی معاہدے کے باقی ماندہ فریقوں روس، چین اور یورپی ٹرائیکا کے مشترکہ اقدامات اور متحدہ موقف کا حصول انتہائی اہمیت کا حامل ہے۔
یورپی ٹرائیکا میں برطانیہ، فرانس اور جرمنی شامل ہیں۔ انہوں نے کہا کہ ایٹمی معاہدے کے حوالے سے پیش آنے والی تازہ صورتحال کا ذمہ دار ایران کو قرار دینا سخت غلطی ہو گی۔ روسی وزیر خارجہ نے خلیج فارس کی کشیدگی کی جانب اشارہ کرتے ہوئے کہا کہ ان کا ملک اختلافات کو مذاکرات کے ذریعے حل کیے جانے کا خواہاں ہے۔
قابل ذکر ہے کہ حالیہ ہفتوں کے دوران علاقے میں امریکی فوجیوں روانگی اور ایرانی تیل پر پابندیوں کے نتیجے میں خلیج فارس کے علاقے میں کشیدگی شدت اختیار کر گئی ہے۔
اسلامی جمہوریہ ایران کے حکام نے بارہا یہ بات زور دے کر کہی ہے کہ امریکہ کے ہرقسم کے جنگ پسندانہ اقدام کا منھ توڑ جواب دیا جائے گا۔