ادرک کا صرف ایک ٹکڑا اور تکالیف سے فوری نجات
جڑ نما سبزی ’ادرک‘ کا استعمال کھانا پکانے کے مسالے سے لے کر ادویات تک کیا جاتا ہے، اس کی بڑی وجہ یہ ہے کہ غذائیت اور بہت سارے طبی فوائد سے بھرپور چیز ہے۔
کیا آپ اس بات سے واقف ہیں کہ ادرک ہماری صحت کے لیے کتنی مفید ہے؟ بد ہضمی سے لے کر مدافعتی نظام کو بہتر بنانے تک یہ سبزی آپ کو فائدہ پہنچاتی ہے۔
بہت سے لوگ مختلف اقسام کے درد کی شکایات دور کرنے کیلئے درد کش ادویات کا سہارا لیتے ہیں جس کے کسی نہ کسی شکل میں سائیڈ افیکٹس بھی ہوسکتے ہیں۔
ماہرین صحت کہتے ہیں کہ باورچی خانے میں موجود یہ چیز آپ کے جسم کے کسی بھی درد کو ختم یا کم کرنے میں بے حد مددگار ثابت ہوسکتی ہے۔
جسمانی درد سے نجات پانے کے لیے ایک انتہائی سستا علاج ادرک کی صورت میں ہمارے گھر میں ہی موجود ہے، آج ہم آپ کو اس مضمون میں ادرک کے استعمال کا طریقہ بیان کریں گے۔
ادرک کے صحت سے متعلق فوائد
جان لیجیے کہ ادرک کے ایک چھوٹے سے ٹکڑے سے ان دردوں کو آسانی سے روکا جاسکتا ہے۔ ماہرین کا کہنا ہے کہ ادرک میں کئی دواؤں کی خصوصیات ہیں جو صحت کے لیے بہت مفید ہیں۔
ماہرین صحت کے مطابق ادرک میں جنجرول نامی عنصر پایا جاتا ہے جو جوڑوں اور پٹھوں کے درد کو کم کرتا ہے۔ جنجرول میں خاص طور پر سوزش کی خصوصیات ہیں۔
ادرک میں میگنیشیم، کاپر اور بی 6 وٹامنز وافر مقدار میں پائے جاتے ہیں جو جوڑوں کے درد اور کسی بھی قسم کے درد سے نجات دلاتے ہیں اور صحت کے لیے فائدہ مند ہیں۔ ادرک کو روزانہ کی خوراک کا حصہ بنانے سے جوڑوں کے درد اور گٹھیا کے مسئلے سے بھی بچا جا سکتا ہے۔
کیسے استعمال کریں ؟
کہا جاتا ہے کہ اگر آپ صبح کے وقت ادرک اور ہلدی ملا کر پانی میں ابال کر پی لیں یا ادرک کی چائے پی لیں تو آپ کو اچھے نتائج ملیں گے۔
درد کے ساتھ ساتھ یہ نزلہ اور کھانسی سے بھی آرام دیتا ہے، ماہرین کا کہنا ہے کہ کچن میں دستیاب ادرک کا استعمال صحت کے لیے درد کم کرنے والی گولیاں لینے اور درد کم کرنے والی کریمیں لگانے سے زیادہ فائدہ مند ہے۔ یہی نہیں ادرک کے اور بھی بہت سے فوائد ہیں۔
ماہرین کا کہنا ہے کہ ادرک کولیسٹرول کو کم کرتی ہے، یہ خراب کولیسٹرول کو کم کرنے اور اچھے کولیسٹرول کو بڑھانے میں بھی مددگار ثابت ہوتی ہے۔ کچی ادرک یا ادرک کا پانی اور ادرک کی چائے کے استعمال سے خراب کولیسٹرول کو ختم کیا جا سکتا ہے۔ اسے دل کی صحت کے لیے اچھا سمجھا جاتا ہے۔
اس کے علاوہ ہاضمے کے مسائل فوری ٹھیک کرتی ہے، بدہضمی، پیٹ میں درد، پیٹ پھولنا اور متلی جیسے مسائل میں مبتلا افراد ادرک کے استعمال سے فوری آرام حاصل کرتے ہیں۔
ماہرین کی جانب سے یہ تجویز کیا جاتا ہے کہ ادرک کی چائے یا دودھ کے بغیر کالی چائے پینے سے چند منٹوں میں پیٹ کے درد سے نجات مل سکتی ہے۔ اس کے علاوہ ماہرین کا کہنا ہے کہ ادرک تناؤ اور پریشانی کے احساسات کو دور کرتی ہے اور دماغی صحت کو بہتر بناتی ہے۔
