ایران اور فرانس کے تعلقات
ایران اور یورپ کے تعلقات میں ایک نیا موڑ آ رہا ہے۔ مبصرین اسلامی جمہوریہ ایران کے صدر ڈاکٹر حسن روحانی کے یورپی ممالک کے دورے کو انتہائی اہمیت دے رہے ہیں۔ اٹلی کے دورے کے بعد ڈاکٹر حسن روحانی فرانس کے دورے پر بدھ کے دن پیرس پہنچے۔
انہوں نے پیرس پہنچنے کے بعد پہلے فرانس کی اہم کمپنیوں کے سربراہوں سے ملاقات کی اور ایک اقتصادی نشست سے خطاب کیا۔ صدر مملکت نے اجلاس سے خطاب کرتے ہوئے کہا کہ ایرانی اور فرانسیسی کمپنیوں کے لئے کسی طرح کی رکاوٹ موجود نہیں ہے اور تہران، سرمایہ اور ٹیکنالوجی ایران پہنچنے اور مشترکہ علاقائی و عالمی منڈی کے قیام کا خیرمقدم کرتا ہے-
صدر مملکت نے اس نشست سے خطاب کرتے ہوئے کہا فوری طور پر بینکنگ اور انشورنس کا راستہ ہموار کرنے، دونوں ملکوں کے درمیان اقتصادی اشتراک عمل از سر نو شروع کرنے کے لئے مناسب ہے- صدر روحانی نے ایران کے چھٹے ترقیاتی منصوبے میں آٹھ فیصد اقتصادی ترقی کی شرح کی پیشگوئی کی جانب اشارہ کرتے ہوئے کہا کہ اس ہدف کے حصول کے لئے مزید سرمایہ کاری، ٹیکنالوجی اور فعالیت کی ضرورت ہے اور ایران نئی ٹیکنالوجی اور بیرونی سرمایہ کاری کا خیرمقدم کرتا ہے۔اس موقع پر فرانس کے وزیر خارجہ لوران فابیوس نے صدر روحانی کے دورہ پیرس پر خوشی کا اظہار کیا اور کہا کہ ایران ایک بڑا ملک ہے اور اس کا مستقبل روشن ہے اور اس وقت فرانس کی بڑی کمپنیاں، ایران کے ساتھ بڑے پیمانے پر تعاون شروع کرنے کے لئے پرعزم ہیں-
نشست سے خطاب کرتے ہوئے فرانس کے وزیر اقتصاد نے کہا کہ حکومت فرانس نے ایران کے ساتھ تعاون کے لئے اقتصادی اور صنعتی کمپنیوں کو بھرپور موجودگی کے لئے مکمل اختیارات دے دیے ہیں تاکہ دونوں ملکوں کے اقتصادی تعلقات ماضی کی مانند دوبارہ مضبوط و مستحکم ہو جائیں-
ایران کے صدر ڈاکٹر حسن روحانی نے بدھ کو پیرس پہنچتے ہی پہلے ایران اور فرانس کے اقتصادی وفود کی نشست سے خطاب کیا جس میں فرانس کے وزیر خارجہ اور وزیر اقتصاد بھی موجود تھے۔ صدر روحانی فرانس کے صدر فرانسوا اولاند کی دعوت پر پیرس کے دورے پر ہیں-
اسلامی جمہوریہ ایران اور یورپی ممالک کے باہمی قریبی تعاون اور تعلقات میں توسیع کی ضرورت ماضی کی نسبت اب زیادہ محسوس کی جا رہی ہے۔ مشترکہ جامع ایکشن پلان سے یہ بات ثابت ہوچکی ہے کہ اہم بین الاقوامی مسائل کو منطق اور مذاکرات کے ذریعے حل کیا جاسکتا ہے اور ایٹمی معاہدہ تمام بین الاقوامی مسائل کو مذاکرات کے ذریعے حل کرنے کے سلسلے میں مثالی حیثیت رکھتا ہے۔ ایران اور فرانس ماضی میں بھی مختلف شعبوں میں ایک دوسرے کے ساتھ تعمیری تعاون اور مذاکرات انجام دے چکے ہیں اور موجودہ دور میں دونوں ممالک کے باہمی تعاون سے جہاں علاقے کے بہت سے مسائل حل ہوں گے وہیں خطے میں اقتصادی خوشحالی بھی آئے گی۔
