چین کی پہلی مال گاڑی کی ایران آمد
چین کی پہلی مال گاڑی ترکمنستان کے راستے ایران پہنچ گئی۔
چین کی یہ ریل مال گاڑی قزاقستان اور ترکمنستان سے ہوتے ہوئے بدھ کی شام ایران کے شمال مشرقی شہر سرخس پہنچی۔ یہ مال گاڑی دو ہفتے قبل چین کے صوبے جہ جیانگ کے شہر یی وو سے روانہ ہوئی تھی۔ اس پروجیکٹ پر چین کی کمپنی ٹیانمن کام کر رہی ہے اور اس نے اعلان کیا ہے کہ یہ پہلی مال گاڑی ہے جو چین کو وسطی ایشیا کے ملکوں اور ایران سے متصل کر رہی ہے۔
تجارتی سامان سے لدی ہوئی چین سے ایران پہنچنے والی اس ٹرین نے ایران پہنچنے کے لئے دس ہزار تین سو انتالیس کلو میٹر کا راستہ طے کیا اور اس راستے کو طے کرنے میں اس کو چودہ دن لگے۔ توقع کی جا رہی ہے کہ شاہراہ ریشم کو دوبارہ فعال کرنے کے پروجیکٹ کے تحت ریلوے ٹریک سے شروع ہونے والی ان تجارتی سرگرمیوں سے وسطی ایشیا، مشرق وسطی اور ایران سے چین کی تجارت بہت زیادہ بڑھ جائے گی۔
