SAHAR

ہندوستان میں انسانی حقوق کے کارکنوں نے دو نیپالی خواتین کو جنسی زیادتی کا نشانہ بنانے والے سعودی عرب کے سفارت کار کے خلاف مظاہرہ کیا

ارنا کی رپورٹ کے مطابق ہندوستان کے دارالحکومت نئی دہلی میں انسانی حقوق کے کارکنوں نے سعودی عرب کے سفارت خانے کے سامنے احتجاجی مظاہرہ کیا۔ مظاہرین نے دو نیپالی خواتین کو جنسی زیادتی کا نشانہ بنانے پر مبنی سعودی عرب کے سفارت کار کے اقدام کی مذمت کرتے ہوئے سفارتی استثنیٰ کو ختم کر کے اس پر مقدمہ چلانے کا مطالبہ کیا۔


آل انڈیا ڈیموکریٹک ویمن ایسوسی ایشن کی جنرل سیکریٹری جگمتی سنگوان نے اس مظاہرے میں کہا ہے کہ مجرموں اور جنسی زیادتی کرنے والوں کو سفارتی استثنی حاصل نہیں ہونا چاہئے اور ان کے خلاف قانون کے مطابق کارروائی کی جانی چاہئے۔


 ہندوستان کے دار الحکومت نئی دہلی سے ملحق شہر گڑگاؤں کی پولیس نے بتایا ہے کہ سعودی عرب کے ایک سفارت کار کے خلاف دو نیپالی خواتین سے جنسی زیادتی کے معاملے میں تحقیقات ہو رہی ہیں۔ گڑگاؤں پولیس کے جوائنٹ کمشنر سوربھ سنگھ کا کہنا تھا کہ ابھی کوئی گرفتاری عمل میں نہیں آئی ہے۔


تیس اور پچاس برس کی دو نیپالی خواتین نے تھانے میں ایف آئی آر درج کرا دی ہے جس میں انہوں نے موقف اختیار کیا ہے کہ سعودی عرب کے ایک سفارت کار نے انھیں اغوا کیا اور ایک فلیٹ میں ان کو جنسی زیادتی کا نشانہ بنایا۔


گڑگاؤں پولیس کے مطابق ان نیپالی خواتین کا کہنا ہے کہ پہلے انھیں سعودی عرب کے شہر جدہ لے جایا گیا جہاں وہ گھر میں کام کرتی تھیں اور پھر ان کے ساتھ جنسی زیادتی کی گئی اور کچھ دن پہلے ان خواتین کو سعودی عرب سے واپس ہندوستان لایا گیا تھا اور گڑگاؤں کے ایک فلیٹ میں لے جایا گیا جہاں ان کے ساتھ جنسی زیادتی کی گئی۔

 گڑگاؤں پولیس کا کہنا ہے کہ اس فلیٹ کو دہلی میں واقع سعودی عرب کے سفارت خانے نے کرایے پر لیا تھا۔ سعودی عرب کے سفارت خانے نے جنسی زیادتی کے الزام کو بے بنیاد قرار دیا ہے۔