SAHAR

نیپال نے ہندوستان کے تیرہ سرحدی محافظوں کو رہا کردیا ہے

اطلاعات کے مطابق اتوار کے روز نیپالی پولیس نے ہندوستان کے تیرہ سرحدی محافظوں کو حراست میں لینے کے بعد رہا کر دیا۔ ہندوستان کا کہنا ہے کہ یہ سرحدی محافظ اسمگلروں کا پیچھا کرتے ہوئے سرحدی علاقوں کو عبور کرکے نیپال میں داخل ہوگئے تھے۔

ہندوستانی میڈیا کے مطابق اتوار کو مقامی وقت کے مطابق صبح سات بجے ہندوستان کے دو سرحدی محافظ اسمگلروں کا پیچھا کرتے ہوئے نیپالی سرحد میں داخل ہوگئے تھے جن کو نیپالی پولیس نے گرفتار کر لیا۔ اس کے بعد گیارہ دیگر ہندوستانی سرحدی محافظ اپنے ساتھیوں کو چھڑانے گئے تو ان کو بھی نیپالی پولیس نے حراست میں لے لیا۔ تا ہم دوپہر تک ہندوستان کے سرحدی محافظوں کو رہا کر دیا گیا۔

نیپالی پولیس کا کہنا ہے کہ چونکہ ہندوستانی سرحدی محافظ ہتھیاروں کے ساتھ نیپال میں داخل ہوئے تھے اس لئے ان کو حراست میں لے لیا گیا تھا۔ نیپالی میڈیا کے مطابق ہندوستان کے تیرہ سرحدی محافظوں کو معافی مانگنے کے بعد رہا کیا گیا ہے۔

قابل ذکر ہے کہ نیپال میں نئے آئین کے خلاف مدھیسی تحریک کے مظاہروں کے بعد ہندوستان اور نیپال کے تعلقات میں شدید کشیدگی پیدا ہوگئی ہے اور ہندوستان نے نیپال کے لئے برآمدات پر پابندی لگا دی ہے۔ نیپالی حکام ہندوستان پراس تحریک کی حمایت کا الزام لگاتے ہیں۔ ہندوستان اس الزام کی تردید کرتا ہے۔