فسادیوں کو انجام تک پہنچانے کا اعلان
پاکستان کےآرمی چیف نے کہا ہے کہ آپریشن ”ردالفساد“ کے ذریعے فسادیوں کو انجام تک پہنچائیں گے۔
فوج کے ادارہ تعلقات عامہ کے مطابق آرمی چیف جنرل قمر جاوید باجوہ نے ملتان گریژن کا دورہ کیا، آرمی چیف نے مظفر گڑھ فائرنگ رینج میں تربیتی مشقیں بھی دیکھیں ،جنرل قمر جاوید باجوہ نے فوجی اہلکاروں کے تربیتی معیار اور تیاریوں کی تعریف کی اور کہا کہ پاک فوج حالیہ جنگی تجربات کے نتیجے میں اپنا ثانی نہیں رکھتی۔ فوجی افسروں اور اہلکاروں سے گفتگو کرتے ہوئے آرمی چیف جنرل قمر جاوید باجودہ نے کہاکہ مسلح افواج کا داخلی سلامتی میں اہم کردار ہے، آپریشن ”ردالفساد“ کے ذریعے فسادیوں کو انجام تک پہنچائیں گے اور اپنے ملک میں معاملات کو معمول پر لانے کے لئے اپنا کردار ادا کریں گے۔
آرمی چیف نے فوجیوں کو مردم شماری کے حوالے سے دی جانے والی تربیت کا بھی مشاہدہ کیا اور تیاریوں کی تعریف کرتے ہوئے کہا کہ مردم شماری ایک اہم قومی معاملہ ہے، اس کے لئے پاک فوج بھرپور تعاون کرے گی۔ واضح رہے کہ آپریشن ”ردالفساد“ سے پہلے آپریشن ضرب عضب اور آپریشن خیبر ون اور آپریشن خیبر ٹو بھی شروع ہوا تھا۔
