ہندوستانی فضائیہ کا طیارہ تباہ، ہوا باز ہلاک
ہندوستان کی ریاست گجرات کے علاقے کچھ میں فضائیہ کا ایک لڑاکا طیارہ حادثے کا شکار ہو گیا جس کے نتیجے میں طیارے کا ہوا باز ہلاک ہو گیا۔
ہندوستانی میڈیا نے خبر دی ہے کہ ہندوستانی فضائیہ کا جگوار جنگی طیارہ معمول کی تربیتی پرواز کے لئے جام نگر ایئر بیس سے اڑان بھرنے کے تھوڑی دیر کے بعد حادثے کا شکار ہو گیا-
یہ حادثہ مقامی وقت کے مطابق صبح ساڑھے دس بجے پیش آیا- طیارہ ایک گاؤں کے کھیت میں گرا جس سے کوئی جانی نقصان نہیں ہوا البتہ وہاں موجود کچھ مویشی ہلاک ہو گئے-
مقامی لوگوں کا کہنا ہے کہ ہندوستانی فضائیہ کے جگوار طیارے کا ملبہ گاؤں کے باہری علاقے میں دور دور تک پھیلا ہوا ہے- عینی شاہدین کا کہنا ہے کہ سیکورٹی ایجنسی کے اہلکاروں نے جائے حادثہ پر پہنچ کر علاقے کو اپنے گھیرے میں لے لیا-
دوسری جانب ہندوستانی فضائیہ کے ہیڈکوارٹر نے حادثے کا پتہ لگانے کے لئے کورٹ آف انکوائری کا حکم دے دیا ہے- ہلاک ہونے والے ہوا باز کا نام سنجے چوہان بتایا گیا ہے۔
