الیکشن کمیشن آف انڈیا نے نئے ووٹروں کے اندراج کیلئے استعمال ہونے والے فارم 6 میں کی گئی متنازع ترمیم کو ان ریاستوں میں ہٹا دیا ہے جہاں ووٹر فہرستوں کی خصوصی جامع نظرثانی، ایس آئی آر، مکمل ہو چکی ہے۔

سحرنیوز/ہندوستان: ہندوستان کی سرکاری خبر رساں ایجنسی، پی ٹی آئی، کے مطابق، یہ تبدیلی فارم 6 کے درخواست گزاروں سے ایک حلف نامہ/اعلان طلب کرنے سے متعلق تھی جس میں انہیں یہ بتانا تھا کہ وہ خود، ان کے والدین یا دادا دادی/نانا نانی ماضی میں ہونے والی خصوصی جامع نظرثانی کے دوران تیار کی گئی ووٹر فہرستوں میں درج تھے یا نہیں۔ اس تبدیلی کے بعد اب یہ اعلان صرف ان ریاستوں اور مرکز کے زیر انتظام علاقوں کے درخواست گزاروں کیلئے لازمی ہوگا جہاں ایس آئی آر کا عمل ابھی جاری ہے۔

یہ تبدیلیاں الیکشن کمیشن کی سائٹ پر الیکشن کمیشن کے اس فیصلے کے چند روز بعد کی گئی ہیں جس میں کہا گیا تھا کہ مذکورہ اعلان صرف انہیں علاقوں میں درکار ہوگا جہاں ایس آئی آر جاری ہے۔ اعلان سے متعلق یہ معاملہ دی انڈین ایکسپریس کی ان رپورٹوں کے بعد سامنے آیا جن میں بتایا گیا تھا کہ الیکشن کمشنروں کے اعتراضات کے باوجود فارم 6 میں یہ شق شامل کی گئی تھی۔

ہمیں فالو کریں:

Follow us: Facebook, X, instagram, tiktok  whatsapp channel