SAHAR

ایران کے نائب وزیر خارجہ حسین امیر عبداللھیان نے کہا ہے کہ خطے اور خطے سے باہر کے ملکوں کی انٹیلی جینس ایجنسیوں کے کردار کی وجہ سے دہشت گرد گروہ داعش مضبوط ہوا ہے۔

حسین امیر عبداللھیان نے پیرس سانحے کی جانب اشارہ کرتے ہوئے کہا کہ ایران پہلے ہی خبر دار کرچکا تھا کہ دہشت گردی کی حمایت کرنے والے ممالک اس خطرے کو سنجیدہ سمجھیں کیونکہ یہ آگ خود ان کے ملکوں تک بھی پہنچ سکتی ہے۔

ایران کے نائب وزیر خارجہ نے کہا کہ یہ بات کھل کر تو نہیں کہی جاسکتی کہ کن ملکوں نے داعش کو بنایا ہے تاہم ایران کے انتباہات پر توجہ نہ دینے کی وجہ سے ان ملکوں کو ایسے نتائج کا سامنا کرنا پڑ رہا ہے۔

قابل ذکر ہے کہ پیرس میں جمعے کی شب پیش آنے والے فائرنگ کے واقعات اور خودکش دھماکوں میں ایک سو بتیس افراد ہلاک اور ساڑھے تین سو کے قریب زخمی ہوگئے تھے۔ دہشت گرد گروہ داعش نے اس حملے کی ذمہ داری قبول کی ہے۔