SAHAR

ایران کی تشخیص مصلحت نظام کونسل کے اسٹریٹیجک تحقیقاتی سینٹر کے سربراہ ڈاکٹر علی اکبرولایتی نے کہا ہے کہ ایران سعودی عرب کے ساتھ کشیدگی بڑھانا نہیں چاہتا بلکہ پورے اقتدار کے ساتھ اس بحران کو حل کرنے کی خواہش رکھتا ہے

ڈاکٹرعلی اکبرولایتی نے اتوار کو اپنے ایک بیان میں اس بات کا ذکر کرتے ہوئے کہ سعودی عرب کو ایران کی حقیقی طاقت کا اچھی طرح اندازہ ہے کہا کہ ایران کو امید ہے کہ علاقے کے بحران جلد سے جلد ختم ہو جائیں گے اور ایران کی بھی اب تک یہی کوشش رہی ہے کہ یہ بحران حل ہو -

ڈاکٹرولایتی نے جو عالمی امور میں رہبرانقلاب اسلامی کے مشیر بھی ہیں کہا کہ سعودی عرب نے ہمیشہ علاقے میں بدامنی پیدا کرنے میں بنیادی رول ادا کیا ہے - ان کا کہنا تھا کہ افغانستان میں طالبان اور القاعدہ سعودی عرب کی ہی مالی مدد سے برسراقتدار آئے تھے جس سے علاقے میں سعودیوں کے تخریب کارانہ ماضی کی نشاندہی ہوتی ہے -

ڈاکٹرولایتی نے کہا کہ سعودیوں نے اسلامی ملکوں کے دینی مدارس میں اپنا اثر و رسوخ پیدا اور انتہاپسندانہ تکفیری سوچ کی تبلیغ کر کے مشرق وسطی اور افریقا کے ملکوں میں داعش ، جبہتہ النصرہ ، جیش الاسلام اور بوکوحرام جیسے دہشت گردگروہوں کو جنم دیا ہے -

تشخیص مصلحت نظام کونسل کے اسٹریٹیجیک تحقیقاتی سینٹر کے سربراہ نے کہا کہ شام ، عراق اور یمن میں داعش کی شکست اور عالمی رائے عامہ میں سعودی عرب کے تئیں پائی جانے والی نفرت و بیزاری کے باعث سعودیوں کی خودساختہ ہیبت کا بت پاش پاش ہو گیا ہے -

ڈاکٹر ولایتی نے ایران کے سلسلے میں سعودی عرب کے کشیدگی پیدا کرنے والے اقدام اور ممتازعالم دین آیت اللہ باقر نمر کو شہید کئے جانے کے بارے میں کہا کہ سعودی حکومت ایران اور پانچ جمع ایک کے درمیان ایٹمی سمجھوتے سے ناراض ہو کر مشرق وسطی میں سرگرم اپنے حمایت یافتہ دہشت گرد گروہوں کے لئے اب مغرب اور خاص طور پر امریکا کی زیادہ سے زیادہ حمایت حاصل کرنے کی کوشش کر رہی ہے -