ایران کی جانب سے باچا خان یونیورسٹی پر دہشت گردانہ حملے کی مذمت
-
ایرانی وزارت خارجہ کے ترجمان صادق حسین جابری انصاری
اسلامی جمہوریہ ایران کی وزارت خارجہ نے پاکستان کے صوبہ خیبر پختونخوا میں باچا خان یونیورسٹی پر دہشت گردوں کے حملے کی مذمت کی ہے۔
ایرانی وزارت خارجہ کے ترجمان صادق حسین جابری انصاری نے بدھ کے روز ایک بیان میں پاکستان میں حالیہ دہشت گردی کے واقعہ میں مرنے والوں کے اہل خانہ کو تعزیت پیش کرتے ہوئے ان سے ہمدردی کا اظہار کیا اور کہا کہ ایران اس قسم کے واقعات کو پاکستانی قوم اور عالم اسلام کے دشمنوں کے مقاصد کے تناظر میں دیکھتا ہے۔
انھوں نے اس بیان میں کہا کہ ایران دہشت گردی اور انتہا پسندی کے خلاف مشترکہ عالمی کوشش اور جد وجہد کی ضرورت کے بارے میں اپنے اصولی موقف پر زور دیتا ہے۔
واضح رہے کہ دہشت گردوں نے بدھ کے روز چارسدہ کے قریب باچا خان یونیورسٹی پر حملہ کر کے کم از کم بیس افراد کو قتل کر دیا تھا سیکورٹی فورسز کی جوابی کارروائی میں چار دہشت گرد ہلاک ہو گئے تھے۔
