SAHAR

اقوام متحدہ میں ایران کے سفیر غلام حسین دہقانی نے کہا ہے کہ آج دنیا کے صرف باسٹھ افراد نے جو دولت اپنے پاس جمع کر رکھی ہے وہ دنیا کی آدھی آبادی کی دولت کے برابر ہے اور ایک فیصد افراد کی دولت باقی ننانوے فیصد کی کل جمع پونجی سے بھی زیادہ ہے۔

غلام حسین دہقانی نے پیر کے دن اقوام متحدہ کے کمیشن برائے سماجی ترقی کے چوّن ویں اجلاس میں تقریر کرتے ہوئے عدم مساوات کو سماجی ترقی کی راہ میں ایک بڑی رکاوٹ قرار دیا۔

غلام حسین دہقانی نے صدر مملکت ڈاکٹر حسن روحانی کی جانب سے پیش کردہ تشدد اور انتہا پسندی سے پاک دنیا پر مبنی تجویز اور ایک قرارداد کی صورت میں اس کی منظوری کی جانب اشارہ کرتے ہوئے کہا کہ یہ تجویز اس لئے پیش کی گئی کیونکہ غربت اور پسماندگی سے انتہاپسندی اور دہشت گردی کا راستہ ہموار ہوتا ہے۔

اقوام متحدہ میں ایران کے سفیر غلام حسین دہقانی نے بعض ممالک کی جانب سے دہشت گردوں کی حمایت اور ان کو مسلح کئے جانے اور مطلوبہ ممالک میں بھیجے جانے کی جانب اشارہ کرتے ہوئے کہا کہ اس خطرناک عمل کے ان ممالک کی سماجی ترقی پر ناقابل انکار تباہ کن اثرات مرتب ہوتے ہیں۔

اقوام متحدہ میں ایران کے سفیر غلام حسین دہقانی نے ایران میں حالیہ تین عشروں کے دوران سماجی ترقی کے میدان میں ہونے والی پیشرفت کی جانب بھی اشارہ کیا اور اس سلسلے میں غربت کے مقابلے، طبی خدمات، غذائی سیکورٹی اور تعلیم سے محروم بچوں کو تعلیم کی ترغیب دلانے جیسی حکومتی پالیسیوں اور اقدامات کا ذکر کیا۔

اقوام متحدہ کے کمیشن برائے سماجی ترقی کا سالانہ اجلاس تین فروری کو شروع ہوا اور یہ اجلاس بارہ فروری تک جاری رہے گا۔