حضرت زہرا (س) کے یوم شہادت کے موقع پر پورا ایران عزادار اور سیاہ پوش
شہزادی کونین حضرت فاطمہ زہرا (س) کے یوم شہادت کی مناسبت سے پورا اسلامی جمہوریہ ایران سوگوار اور سیاہ پوش ہے۔
پیغمبر اسلام (ص) کی لخت جگر، بی بی دو عالم جناب سیدہ (س) کے یوم شہادت کی مناسبت سے اسلامی جمہوریہ ایران کے تمام چھوٹے بڑے شہروں خاص طور سے مشہد المقدس اور قم المقدسہ میں ہر طرف مجلس عزا اور ماتم و سینہ زنی کا سلسلہ جاری ہے۔ تمام مساجد و امام بارگاہوں سے نوحہ خوانی کا سلسلہ جاری ہے اور جلوس عزا نکالے جا رہے ہیں۔ مساجد، امام بارگاہوں اور مذہبی مقامات نیز سڑکوں پر سیاہ پرچم لگے ہوئے ہیں۔
مشہد المقدس میں فرزند رسولۖ حضرت امام علی رضا (ع) اور قم المقدسہ میں حضرت فاطمہ معصومہ (س) کے روضوں میں عزاداروں کا جم غفیر ہے جہاں اہلبیت اطہار (ع) کے عقیدتمندوں کی جانب سے اشکبار آنکھوں سے شہزادی کونین حضرت فاطمہ زہرا (س) کی شہادت کی مناسبت سے پرسہ دیا جا رہا ہے۔ مقدس روضوں کی فضا اہلبیت اطہار (ع) کے شیدائیوں کی آہ و بکا کی آوازوں سے گونج رہی ہے۔ سوگواروں و عزاداروں کی جانب سے نہایت عقیدت و احترام کے ساتھ بی بی دو عالم حضرت فاطمہ زہرا (س) کو خراج عقیدت پیش کیا جا رہا ہے۔
پیغمبر اسلام (ص) کی لخت جگر، شہزادی کونین، حضرت فاطمہ زہرا (س) کے یوم شہادت کی مناسبت سے سحر عالمی نیٹ ورک، اہلبیت اطہار (ع) کے تمام چاہنے والوں کی خدمت میں بادل مغموم تعزیت پیش کرتا ہے۔
