ملت ایران نے اسلاموفوبیا اور ایرانوفوبیا کو ناکام بنا دیا: صدر روحانی
صدر مملکت ڈاکٹر حسن روحانی نے کہا ہے کہ ایرانی عوام نے، اسلامو فوبیا اور ایرانو فوبیا کی سازشوں کو ناکام بنادیا ہے۔
ایران کے صوبے سمنان کے مرکزی شہر سمنان میں ایک بڑے عوامی جلسے سے خطاب کرتے ہوئے صدر حسن روحانی نے کہا ہے کہ ایران کے عوام نے ہر قسم کے علاقائی اور بین الاقوامی دباؤ اور پابندیوں پر غلبہ پا لیا ہے اور بڑی طاقتوں اور صیہونیوں کی جانب سے اسلاموفوبیا اور ایرانو فوبیا کی کوششوں کو پوری طرح بےاثر کر دیا ہے۔
صدر مملکت نے کہا کہ ایٹمی معاہدے کے نتیجے میں ایران کے خلاف ، سلامتی کونسل کی چھے اور آئی اے ای اے کے بورڈ آف گورنر کی بارہ قراردادیں یکے بعد دیگرے تاریخ کے کوڑے دان میں ڈال دی گئی ہیں۔
صدر نے کہا کہ ایران کی عظیم قوم نے ایٹمی میدان میں ایک عظیم اور تاریخ ساز کامیابی حاصل کی ہے اور اس نے ثابت کر دیا ہے کہ ملت ایران کسی طاقت کے سامنے سرجھکانے والی نہیں۔
ڈاکٹرحسن روحانی نے ایک بار پھر یہ بات زور دے کر کہی کہ پابندیوں کی زنجیر ٹوٹ چکی ہے اور آج ایران کے عالمی بینکاری رابطے یکے بعد دیگرے بحال ہوتے جا رہے ہیں ۔ صدر کا کہنا تھا کہ آج ایران کی برآمدات کا راستہ کھل گیا ہے، البتہ غیر ملکی سرمایہ کاری کے فروغ میں وقت لگ سکتا ہے ۔
صدر حسن روحانی صوبائی دورے کے آغاز کے پہلے مرحلے میں منگل کی صبح سمنان پہنچےجہاں انہوں نے کئی ترقیاتی منصوبوں کا افتتاح کیا ہے۔
وہ آج صوبائی ترقیاتی و سرمایہ کاری بورڈ اور انتظامی کونسل کے الگ الگ اجلاسوں کے علاوہ ، صوبے کے علمائے کرام، دانشوروں، معزز شخصیات ، اور شہدا کے اہل خانہ سے بھی ملاقات کریں گے۔
کابنیہ کے متعدد وزرا بھی صدر حسن روحانی کے ساتھ ، سمنان کا دورہ کر رہے ہیں۔
