SAHAR

اسلامی جمہوریہ ایران کی بحریہ کے کمانڈر نے کہا ہے کہ دیگر ممالک کے ساتھ ایران کے بحری رابطوں کو فروغ دینے کا مقصد ایرانوفوبیا کو روکنا ہے کہ جو سامراج کی جانب سے پھیلایا جا رہا ہے-

ایڈمیرل حبیب اللہ سیاری نے ہفتہ دفاع مقدس کی مناسبت سے منعقدہ ایک تقریب کے موقع پر انٹرویو دیتے ہوئے کہا کہ فوج کی اسٹریٹیجک بحریہ فورس کا شمالی بحرہند اور دیگر سمندری علاقوں کے دوروں کا مقصد درحقیقت بحری رابطوں کو فروغ دینا ہے-

بحریہ کے کمانڈر نے کہا کہ جب ہم مختلف بندرگاہوں پر ملکوں سے رابطہ کرتے ہیں اور دنیا و علاقے میں امن و دوستی کا پیغام دیتے ہیں تو یہ سب کے لئے بہت دلچسپی کا باعث ہوتا ہے اور وہ یہ جان لیتے ہیں کہ ایران کے عوام امن پسند، سمجھدار، دیانت دار اور منطقی ہیں-

انھوں نے کہا کہ ہمارے بحری بیڑے اسی حکمت عملی کے ساتھ مختلف ملکوں کی بندرگاہوں کا سفر کرتے ہیں اور اس کے جواب میں بہت سے ممالک کے وفود ہماری شمالی اور جنوبی بندرگاہوں کا دورہ کرتے ہیں اور اسی تناظر میں گذشتہ ہفتے اٹلی کے ایک اعلی فوجی وفد نے ایران کا دورہ کیا تھا کہ جو اسلامی جمہوریہ ایران کی بحریہ کے ساتھ ہمہ گیر تعلقات کو فروغ دینے کی کوشش کررہا ہے-

ایران کی بحریہ کے کمانڈر نے کہا کہ کل بھی ہم نے ایک بحری بیڑا پاکستان کے لئے روانہ کیا ہے جو ستائیس ستمبر کو کراچی بندرگاہ پر پہنچے گا -