ایران اور شام کے وزرائے خارجہ کی ملاقات
اسلامی جمہوریہ ایران اور شام کے وزرائے خارجہ نے شام کی تازہ ترین صورتحال اور جنگ بندی پر بات چیت کی ہے-
اسلامی جمہوریہ ایران کے وزیرخارجہ محمد جواد ظریف اور شام کے وزیرخارجہ ولید المعلم نے ہفتے کو تہران میں اپنی ملاقات میں شام کے جنگ زدہ عوام کے لئے انسان دوستانہ امداد کی ترسیل ، دہشت گردی کے خلاف اور شام کے بحران کے حل کے لئے سیاسی مذاکرات کے لئے پیش کئے گئے فارمولے پر تفصیل سے بات چیت کی - شام کے وزیرخارجہ ایران اور شام کے حکام کے درمیان جاری مسلسل صلاح ومشورے کے تحت ہفتے کی دوپہر تہران پہنچے ہیں - شامی وزیرخارجہ تہران میں اپنے قیام کے دوران صدر ڈاکٹر حسن روحانی اور اعلی قومی سلامتی کونسل کے سکریٹری علی شمخانی سے بھی ملاقات کریں گے -
شامی وزیرخارجہ کے ساتھ شام کی قومی سلامتی کے امور کے مشیر بھی تہران کے دورے پرآئے ہیں - پچھلے چند روز کے دوران ایران اور شام کے وزرائے خارجہ کے درمیان یہ تیسری ملاقات ہے - ایران، شام اور روس کے درمیان مسلسل صلاح و مشورے کی وجہ سے شام کی صورتحال پوری طرح بدل گئی ہے- اس درمیان شام کے دوسرے بڑے شہر حلب کی آزادی دہشت گردوں اور ان کے آقاؤں پر کاری ضرب تھی اور اس کی وجہ سے شام کا سیاسی منظر نامہ یکسر تبدیل ہوچکا ہے -
