ایران: کان میں دھماکے سے جاں بحق ہونے والوں کے لواحقین سے تعزیت
اسلامی جمہوریہ ایران کے صدر حسن روحانی نے صوبہ گلستان کے آزاد شہر میں کوئلے کی کان میں دھماکے کے نتیجے میں جاں بحق ہونے والے کان کنوں کے ضیاع پر دکھ اور افسوس کا اظہار کرتے ہوئے ان کے لواحقین کے ساتھ ہمدردی کا اظہار کیا ہے۔
صدر حسن روحانی نے اس حادثے میں جاں بحق ہونے والے افراد کے لئے اللہ تعالی کی بارگاہ سے رحمت و مغفرفت طلب کی اور اس حادثے میں زخمی ہونے والوں کی جلد از جلد صحتیابی کے لئے دعا کی۔ صدر حسن روحانی نے حادثے میں متاثرہ افراد کو سہولت فراہم کرنے کے سلسلے میں وزارت داخلہ اور صوبہ گلستان کے گورنر کو خصوصی احکامات بھی صادر کئے۔ واضح رہے کہ اسلامی جمہوریہ ایران کے صوبہ گلستان کے آزاد شہرعلاقے میں کوئلے کی کان میں کل ہونے والے دھماکے کے نتیجے میں 22 افراد جاں بحق، متعدد زخمی جبکہ باقی افراد کو نکالنے کیلئے امدادی کارروائیاں جاری ہیں۔ اس افسوسناک سانحے پر تین روزہ قومی سوگ کا اعلان کیا گیا ہے۔
