ایران کی مسلح افواج کے سربراہ کی اپنے ترک ہم منصب سے ملاقات
ایران کی مسلح افواج کے سربراہ نے اپنے ترک ہم منصب سے ملاقات اور مختلف معاملات پر تبادلہ خیال کیا ہے۔
تفصیلات کے مطابق اسلامی جمہوریہ ایران کی مسلح افواج کے سربراہ میجر جنرل محمد حسین باقری نے منگل کے روز اپنے ترک ہم منصب کے ساتھ ایک ملاقات کے دوران دوطرفہ سیکیورٹی امور، سرحدی صورتحال اور انسداد دہشتگردی کے حوالے سے گفتگو اور بات چیت کی.
فریقین نے اس ملاقات میں ایران اور ترکی کے سرحدی امور، سیکیورٹی تعاون اور دہشتگردی کے خلاف مشترکہ اقدامات کا جائزہ لیا.
میجر جنرل باقری نے اس موقع پر کہا کہ دورہ ترکی کا مقصد عسکری تعاون اور خطے کے مسائل پر میزبان ملک کی قیادت کے ساتھ تبادلہ خیال کرنا ہے.
انہوں نے مزید کہا کہ ایران اور ترکی کے درمیان صدیوں پرانے تعلقات قائم ہیں اور دونوں ممالک کی سرحدیں پُرامن اور محفوظ ہیں.
جنرل باقری کا یہ دورہ ان کے ترک ہم منصب جنرل خلوسی آکار کی دعوت پر کیا جارہا ہے. اس تین روزہ دورے کے موقع پر ایران کی مسلح افواج کے سربراہ ترک صدر رجب طیب اردوان کے نیشنل ڈیفنس کے وزیر اور ترکی کے ادارہ انٹیلی جنس کے سربراہ سے بھی ملاقاتیں کریں گے.
ایران کے اعلی فوجی اور سیاسی وفد میں نائب وزیر خارجہ برائے ایشیا-پسیفک ابراہیم رحیم پور، سپاہ پاسداران انقلاب کی بری فوج کے کمانڈر بریگیڈیر جنرل محمد خاکپور، مسلح افواج کے ڈپٹی چیف آف اسٹاف برائے سیکورٹی اور انٹیلی جنس امور بریگیڈیر جنرل غلام رضا محرابی، سرحدی پولیس فورس کے سربراہ بریگیڈیئر جنرل قاسم رضائی اور سنیئر دفاعی حکام شامل ہیں.
