SAHAR

تہران میں ایوان صدر کے جاری کردہ بیان کے مطابق صدر ڈاکٹر حسن روحانی نے پاکستان کے وزیر اعظم عمران خان سے ٹیلی فون پر بات چیت کرتے ہوئے کہا ہے کہ ایران، ہندوستان اور پاکستان دونوں سے اپیل کر تا ہے وہ بدامنی کی روک تھام اور بے گناہ کشمیریوں کو ہلاکت سے بچانے کے لیے صبر و تحمل کا مظاہرہ کریں۔

صدر حسن روحانی نے برصغیر کے امن کو تہران کے لیے انتہائی  اہمیت کا حامل قرار دیتے ہوئے کہا کہ اسلامی جمہوریہ اس خطے میں پائیدار امن کے قیام اور مسلمانوں کے حقوق  کی بازیابی کے لیے کسی بھی کوشش سے دریغ نہیں کرے گا۔صدر حسن روحانی کا کہنا تھا کہ ایران اور پاکستان شروع ہی سے ایک دوسرے کے دوست، ہمسائے اور بھائی تھے اور آئندہ بھی رہیں گے۔ انہوں نے واضح کیا کہ ایران شروع ہی سے خطے میں کشیدگی اور بدامنی کی روک تھام کی کوشش کرتا آیا ہے۔صدر ایران نے یہ بات زور دے کر کہی کہ کشمیر کے مسلمانوں کو اپنے قانونی حقوق سے فائدہ اٹھانے اور پرامن زندگی بسر کرنے کا حق حاصل ہے - انہوں نے کہا کہ کشمیر کے مسئلہ کو عسکری طریقے سے حل نہیں کیا جاسکتا بلکہ مسائل کو سفارتی طریقوں سے حل کیے جانے کی ضرورت ہے۔

پاکستان کے وزیراعظم عمران خان نے اس موقع پر اسلام آباد اور تہران کے درمیان تعلقات کو دوستانہ اور بردارانہ قرار دیتے ہوئے کہا کہ پاکستان کو بے گناہ کشمیریوں کے قتل عام اور خطے کی بدامنی پر تشویش لاحق ہے۔انہوں نے کہا کہ اسلامی جمہوریہ ایران خطے اور عالم اسلام کے ایک اہم ملک کی حیثیت سے مسئلہ کشمیر کے پائیدار حل میں مثبت کردار ادا کرسکتا ہے۔