SAHAR

 ایران کے سائنسدانوں کی قابل فخر کوششوں کو سراہنے کی غرض سے آٹھ اپریل کو ایٹمی ٹیکنالوجی کا قومی دن قرار دیا گیا ہے۔ آٹھ اپریل دوہزار چھے کو ایران کے قابل ‌فخر سائنسدانوں نے اپنی انتھک محنت کے ذریعے ملک میں ایٹمی سائیکل مکمل کر کے ایران کو پرامن ایٹمی ٹیکنالوجی رکھنے والے ملکوں کی صف میں شامل کیا تھا۔ 

ایران کے محکمہ ایٹمی توانائی کے سربراہ ڈاکٹر علی اکبر صالحی نے اپنے ایک پیغام میں قوم کو ایٹمی ٹیکنالوجی کے قومی دن کی مبارک باد پیش کی ہے۔ ڈاکٹر علی اکبر صالحی کے پیغام میں آیا ہے کہ پچھلے ایک برس کے دوران ایٹمی شعبے میں ایک سو بائیس نئی کامیابیاں حاصل کی گئیں جو بلا شبہ ایٹمی میدان میں ملک کی قابل فخر سرگرمیوں کے فروغ کا ثبوت ہے۔

انہوں نے کہا کہ ایران اسلامی کے خلاف عالمی سامراجی محاذ کی ظالمانہ پابندیوں کے اس دور میں ایران کا محکمہ ایٹمی توانائی ملک کی طبی ضرورتوں کی تکمیل کو اپنی قومی اور اخلاقی ذمہ داری سمجھتا ہے۔انہوں نے کہا کہ  ملک بھر کے اسپتالوں اور طبی مراکز کے لیے لازمی نیوکلیر میڈیسن اور دوسری جوہری اشیاء کی تیاری کا کام پوری تندھی اور تیز رفتاری کے ساتھ جاری ہے اور اس میں کوئی خلل واقع نہیں ہونے دیا جائے گا۔