قرآن کریم کی اہانت پر او آئی سی کا ہنگامی اجلاس
ایران کی وزارت خارجہ کے ترجمان نے بتایا ہے اسلامی تعاون تنظیم کے وزرائے خارجہ کا آن لائن ہنگامی اجلاس پیر 31 جولائی کو ہوگا۔
سحر نیوز/ایران: اسلامی جمہوریہ ایران کی وزارت خارجہ کے ترجمان ناصر کنعانی نے منگل کی رات بتایا ہے کہ اسلامی جمہوریہ ایران اور عراق کے وزرائے خارجہ کی مشترکہ تجویز پر اسلامی تعاون تنظیم کے سیکریٹری جنرل نے پیر 31 جولائی کو وزرائے خارجہ کا آن لائن اجلاس طلب کرلیا ہے۔
ان کا کہنا تھا کہ اسلامی تعاون تنظیم کے وزرائے خارجہ کے ہنگامی اجلاس میں سوئيڈن اور ڈینمارک میں قرآن پاک کی بے حرمتی کے واقعات کا جائزہ لیا جائے گا۔
ایران کے وزیر خارجہ نے سوئيڈن اور ڈینمارک میں قرآن کریم کی بے حرمتی کے واقعات کے فورا بعد مختلف اسلامی ملکوں کے وزرائے خارجہ سے ٹیلی فون پر بات چیت کرتے ہوئے اسلامی تعاون تنظیم کا ہنگامی اجلاس بلانے کی تجویز پیش کی تھی۔
وزیر خارجہ حسین امیرعبداللہیان نے پاکستان، عراق، ترکیہ اور کویت سمیت بعض اسلامی ممالک کے وزرائے خارجہ کے ساتھ ٹیلی فون پر گفتگو کی تھی اور اسلامی تعاون تنظیم کی جانب سے قرآن پاک کی بے حرمتی پر سخت پیغام بھیجنے کا مطالبہ کیا تھا۔
