SAHAR

ایران کے وزیر خارجہ نے قرآن مجید کی مسلسل توہین کو روکنے کیلئے اسلامی تعاون تنظیم کے آن لائن ہنگامی اجلاس کے دوران اپنی تجاویز پیش کیں۔

سحرنیوز/ ایران: ایران پریس کی رپورٹ کے مطابق اسلامی جمہوریہ ایران کے وزیر خارجہ حسین امیر عبداللہیان نے ادیان کی توہین کو جرم قرار دینے اور اسلامو فوبیا کے حوالے سے اسلامی تعاون تنظیم کا خصوصی ایلچی مقرر کرنے کی تجویز پیش کی ہے۔ ایران کے وزیر خارجہ نے یہ تجویز قرآن پاک کی بے حرمتی کے خلاف اسلامی تعاون تنظیم کے آن لائن ہنگامی اجلاس کے دوران پیش کی۔

ایران کے وزیر خارجہ نے ایران، عراق اور سعودی عرب کی اپیل پر اسلامی تعاون تنظیم کا ہنگامی اجلاس بلانے پر تنظیم کے سیکریٹری جنرل حسین ابراہیم طہ کا شکریہ ادا کرتے ہوئے کہا کہ آج کے اجلاس میں قرآن کریم اور دین مبین اسلام کی توہین روکنے کے لیے ٹھوس اقدامات اور فیصلے کیے جانا ضروری ہیں۔ انہوں نے کہا کہ آج کا یہ اجلاس امت واحدہ کی نمائندگي کرنے والے اسلامی ملکوں کی حثیت سے نہ صرف مسلمانوں بلکہ تمام آسمانی اور ابراہیمی مذاہب کے ماننے والوں ، ان کے عقائد، اصولوں، اقدار اور مقدسات کے بارے میں شدت پسندانہ رجحان کی روک تھام کے لیے ہمارے پختہ عزم کا آئينہ دار ہے۔

ایران کے وزیر خارجہ نے کہا کہ افسوس کے ساتھ کہنا پڑتا ہے کہ بعض یورپی ملکوں میں اسلام اور مسلمانوں کے خلاف شدت پسندانہ رجحانات میں اضافہ ہورہا ہے اور ان ملکوں کے حکمرانوں کی جانب سے اس غیرانسانی فعل کی حمایت کے سبب یہ معاملہ سخت چیلنج بنتا جارہا ہے۔ حسین امیر عبداللہیان کا کہنا تھا کہ قرآن کریم کی بے حرمتی دنیا کے 2 ارب سے زائد مسلمانوں کے مقدسات اور انسانی اقدار کی توہین ہے جو انتہائی تشویشناک صورت اختیار کرتی جارہی ہے ۔ انہوں نے کہا کہ سب سے زیادہ افسوسناک امر یہ ہے کہ یہ کام آزادی اظہار رائے کے نام پر کیا جارہا ہے اور بعض یورپی ممالک اس کی حمایت کر رہے ہیں۔

ایران کے وزیر خارجہ نے کہا کہ ہم سمجھتے ہیں کہ آسمانی مذاہب اور خاص طور سے مذہب اسلام کی توہین بند کرانا سب کے مفاد میں ہے۔ انہوں نے کہا کہ سوئیڈن اور ڈنمارک میں قرآن مجید کی توہین کے تلخ واقعات نے اسلامی ملکوں کے کاندھوں پر بھاری ذمہ داریاں عائد کردی ہیں کہ وہ یورپی ملکوں  پر دباؤ ڈالیں اور انہیں اس قسم کے واقعات روکنے نیز اس گھناونے فعل کا ارتکاب کرنے والوں کو قرار واقعی ‎سزا دینے پر مجبور کریں۔