ایران کے صوبہ کردستان میں داعش کا نیٹ ورک تباہ؛ سپاہ پاسداران انقلاب اسلامی کا بیان
ایران نے ملک کے صوبہ کردستان میں داعش سے وابستہ دہشت گردوں کا نیٹ ورک تباہ کر دیا۔
سحرنیوز/ایران: ایران کی سپاہ پاسداران انقلاب اسلامی کی جانب سے جاری کردہ ایک بیان میں صوبہ کردستان میں داعش سے وابستہ نیٹ ورک کے خلاف کاروارئی سے آگاہ کیا گیا۔ بیان میں کہا گیا ہے کہ کردستان میں انٹیلی جنس اداروں نے بروقت کاروائی کر کے داعش سے وابستہ دہشت گردوں کے نیٹ ورک کو تباہ کر دیا۔
دہشت گرد عناصر داعش کے تربیت یافتہ بیرونی ممالک کے شہری تھے جو کردستان میں نوروز کی تقریبات کے دوران خودکش دھماکوں کا منصوبہ بنا رہے تھے۔ دہشت گردوں سے متعدد خودکش ہتھیار اور دستی بم برآمد ہوئے ہیں۔ بیان میں مزید کہا گیا ہے کہ بیرونی ایجنسیوں کے آلہ کاروں کا اصل ہدف ملک کے امن کو سبوتاژ کرنا تھا۔ بیان میں زور دیا گیا ہے کہ ہم دہشت گردانہ کارروائیوں کے منصوبہ سازوں اور ان کے حامیوں کو خبردار کرتے ہیں کہ ایران کی عظیم قوم کے خلاف سازشوں اور تخریب کاریوں کا بھرپور جواب دیا جائے گا اور خطے میں شر پسندی کے درپے دشمن کے آلہ کاروں سے آہنی ہاتھوں سے نمٹا جائے گا۔
