خبریں
جدید بحری جہاز ایرانی بحری بیڑے میں شامل
ایران میں ملکی سطح پر تیار کردہ تیرہ جدید بحری جہاز ایرانی بحری بیڑے میں شامل ہوگئے ہیں جس سے دفاعی نظام مزید مضبوط اور مستحکم ہوگا۔
سحرنیوز/ایران:
ایران کے نائب وزیر دفاع ایڈمرل داوود قلیزاد نے خرمشہر میں منعقدہ ایک خصوصی تقریب کے دوران کہا کہ یہ منصوبہ پچیس ملکی اداروں، تحقیقی مراکز اور جامعات کے تعاون سے مکمل کیا گیا ہے۔ انہوں نے کہا کہ ان جہازوں میں جدید کنٹرول سسٹمز، آتشزدگی برداشت کرنے والے کیبلز اور ایک سو بیس میٹر تک پانی پھینکنے کی صلاحیت رکھنے والے فائر فائٹنگ سسٹمز نصب کیے گئے ہیں۔
یہ منصوبہ مارچ دو ہزار پچیس میں مکمل ہوا اور اپریل سے ان جہازوں نے سمندری آزمائشی مراحل میں شرکت شروع کی۔ اس منصوبے کے ذریعے دو کروڑ ڈالر کی زرِمبادلہ کی بچت اور براہ راست ایک ہزار افراد اور بالواسطہ پانچ ہزار افراد کو روزگار فراہم ہوا۔
قلیزادہ نے مزید کہا کہ منصوبے کے دوران ایک ہزار دو سو پچیس سے زائد تکنیکی تجربات کیے گئے اور تئیس تربیتی کورسز کے ذریعے دو ہزار آٹھ سو سترگھنٹے کی تربیت دی گئی۔
انہوں نے ایرانی بحری صنعت کی صلاحیتوں پر روشنی ڈالتے ہوئے کہا کہ ایران اب مسافر بردار اور کنٹینر بردار بحری جہازوں کی ڈیزائننگ اور تیاری کی مکمل اہلیت رکھتا ہے جس سے ایرانی بحری بیڑے کی طاقت اور خودکفالت میں نمایاں اضافہ ہوگا۔
