اسلامی جمہوریہ ایران خطے میں امن، استحکام اور سلامتی کا خواہاں ہے: صدر ڈاکٹر پزشکیان
صدر ایران ڈاکٹر مسعود پزشکیاں نے کہا ہے کہ اسلامی جمہوریہ ایران خطے میں امن، استحکام اور سلامتی کا خواہاں ہے اور اپنے بنیادی اصولوں کی روشنی میں کبھی جوہری ہتھیاروں کے حصول کی کوشش نہیں کی۔
سحرنیوز/ایران: سوئٹزرلینڈ کے نئے سفیر اولیویئر بینگرٹر سے اسنادِ سفارت وصول کرتے ہوئے صدر نے سوئٹزرلینڈ کے تاریخی کردار کو سراہا اور کہا کہ انقلاب اسلامی کی کامیابی کے بعد سے سوئٹزرلینڈ تہران اور واشنگٹن کے درمیان رابطے کا ذریعہ رہا ہے۔
صدر ایران نے غزہ میں اسرائیلی حکومت کے مظالم کی شدید مذمت کرتے ہوئے کہا کہ یہ اقدامات نہ صرف غیر انسانی ہیں بلکہ خطے میں عدم استحکام کی بنیادی وجہ بھی ہیں۔
اس موقع پر سوئس سفیر اولیویئر بینگرٹر نے اسلامی جمہوریہ ایران میں اپنی سفارتی ذمہ داریوں کے آغاز پر خوشی کا اظہار کیا اور کہا کہ ان کا مقصد دونوں ممالک کے تعلقات کو مزید مضبوط بنانا اور تہران و واشنگٹن کے درمیان رابطے کے قابل اعتماد ذریعہ کے طور پر اپنا کردار ادا کرنا ہے۔
انہوں نے یقین دلایا کہ وہ ایرانی عوام کی ثقافت، تاریخ اور مہمان نوازی کو اجاگر کرنے کے لیے بھی بھرپور کوشش کریں گے۔
