دشمنوں کو سخت اور واضح جواب ملے گا
ایران آرمی کے کمانڈرمیجر جنرل امیرحاتمی نے کہا ہے ہماری دفاعی حکمت عملی فعال دفاع اور اسمارٹ ڈیٹرنس پر استوار ہے۔
سحرنیوز/ایران: بحریہ کے قومی دن کے موقع پرایک تقریب سے خطاب کرتے ہوئے ایران آرمی کے کمانڈر کا کہنا تھا کہ فعال دفاع اور اسمارٹ ڈیٹرنس کا مطلب یہ ہے کہ ہم نہ صرف یہ کہ دشمن کے حملے کا انتظار نہیں کریں گے بلکہ قومی مفادات کی بنیاد پر کسی بھی وقت اور کسی بھی جگہ دشمن کو فیصلہ کن جواب دیں گے۔
میجر جنرل امیر حاتمی نے یہ بات زور دے کر کہی کہ آج ملک کی بحری صنعت سرفیس اور انڈر سرفیس فلوٹنگ کے میدان میں بہترین پوزیشن پر پہنچ گئی ہے اور ہمارا ملک بحری دفاع کے مختلف ہتھیاروں کی تیاری میں خود کفیل ہے۔
انہوں نے کہا کہ مجھے یقین ہے کہ یہ کام مسلح افواج کے سپریم کمانڈر آيت اللہ خامنہ ای کے احکامات اور سفارشات کی روشنی میں پوری قوت کے ساتھ جاری رہے گا۔
ہمیں فالو کریں:
Follow us: Facebook, X, instagram, tiktok
میجرجنرل امیرحاتمی کا کہنا تھا کہ ہماری دفاعی طاقت ملک و قوم کی سلامتی کے ساتھ ساتھ خطے کی سلامتی کو یقینی بنانے کا بھی ایک ہہم عنصر ہے کیونکہ آج ہم علاقائی سلامتی اور ملکوں کی سلامتی کو ایک دوسرے سے الگ نہیں کرسکتے۔
ایران کے آرمی چیف نے صیہونی حکومت کی ریشہ دوانیوں کو خطے کے ممالک کے اتحاد کی راہ میں رکاوٹ قرار دیتے ہوئے کہا کہ خوش قسمتی سے اس وقت خلیج فارس اور بحیرہ عمان کے ساحلی ممالک کے درمیان ہم آہنگی کا ایک اچھا رجحان پایا جاتا ہے اور امریکہ و صیہونی حکومت کی پریشانی کی اصل وجہ بھی یہی ہے۔
انہوں نے کہا کہ اسلامی جمہوریہ ایران موجودہ اور آئندہ کے خطرات کو مد نظر رکھتے ہوئے فعال دفاع اور اسمارٹ ڈیٹرنس کی حکمت پر عمل پیرا ہے جس کا مطلب یہ ہے کہ ہم نہ صرف یہ دشمن کے حملے کا انتظار نہیں کریں گے بلکہ قومی مفادات کے تقاضوں کے مطابق کسی بھی وقت اور کسی بھی جگہ دشمن کو فیصلہ کن اور منہ توڑ جواب دیں گے۔
