سعودی عرب پر تنقید، کویت میں رکن پارلیمنٹ کی گرفتاری کا حکم
کویت کے اٹارنی جنرل نے سعودی عرب اور بحرین کی حکومتوں کے خلاف توہین آمیز بیان دینے کے الزام میں کویت کے رکن پارلیمنٹ عبدالحمید الدشتی کو گرفتار کرنے کا حکم دیا ہے۔
ارنا نے اسکائی نیوز کے حوالے سے رپورٹ دی ہے کہ عبدالحمید الدشتی کی گرفتاری کا حکم ایک ایسے وقت میں دیا گیا ہے کہ جب کویت کی پارلیمنٹ نے گزشتہ ہفتے ان کا پارلیمانی تحفظ ختم کر دیا تھا۔
کویت نے گزشتہ ہفتے سعودی عرب کے حکام کے دباؤ کے تحت اپنی پارلیمنٹ کے رکن عبدالحمید الدشتی کا قانونی و عدالتی تحفظ، یمن اور شام کے بارے میں سعودی حکومت کی مخاصمانہ پالیسیوں پر تنقید کی بنا پر ختم کر دیا۔
کویت کی پارلیمنٹ کے رکن عبدالحمید الدشتی نے رواں سال فروری میں شام کے صدر بشار اسد کی حمایت کرنے کے ساتھ ساتھ سعودی عرب کا نام لیے بغیر وہابی فکر کو ختم کرنے کا مطالبہ کیا تھا۔
کویت میں سعودی عرب کے سفارت خانے نے کچھ عرصہ قبل کویتی حکومت کو پیش کی گئی ایک یادداشت میں عبدالحمید الدشتی کے بیان کو سعودی عرب کے داخلی امور میں مداخلت قرار دیتے ہوئے کہا تھا کہ اس بیان سے دونوں ملکوں کے تاریخی تعلقات پر منفی اثر پڑا ہے اور اس سے ممنکہ طور پر سعودی عرب اور کویت کے سیاسی تعلقات ختم ہو سکتے ہیں۔
یہ ایسے وقت میں ہے کہ جب کویت کی پارلیمنٹ کے اسپیکر مرزوق الغانم نے اس سے قبل کہا تھا کہ خلیج فارس کے عرب ممالک کی کسی بھی قسم کی توہین امیر کویت کی توہین ہے۔
