SAHAR

افغانستان کے صوبے لوگر کی ایک عدالت پر طالبان کے حملے میں مذکورہ عدالت کے جج سمیت چار افراد ہلاک ہو گئے ہیں۔

صوبائی کونسل کے رکن نسیم استانکزئی نے اس خبر کی تصدیق کرتے ہوئے کہا ہے کہ اس حملے میں تین حملہ آور بھی مارے گئے ہیں۔ پولیس اور اسپتال کے ذرائع کا کہنا ہے کہ اس حملے میں پندرہ سے بیس افراد زخمی بھی ہوئے ہیں۔

طالبان کے ترجمان ذبیح اللہ مجاہد نے اس حملے کی ذمہ داری قبول کرتے ہوئے متعدد ججوں کو ہلاک اور زخمی کرنے کا دعوی کیا ہے۔

تین روز قبل چار طالبان دہشت گردوں نے صوبہ غزنی کی عدالت پر حملہ کرکے ایک پولیس اہلکار سمیت چار افراد کو ہلاک اور گیارہ کو زخمی کر دیا تھا۔ افغان پولیس کی جوابی کارروائی میں چاروں حملہ آور بھی ہلاک ہو گئے تھے۔