افغان وزارت داخلہ کی جانب سے کابل بم دھماکے کی مذمت
افغانستان کی وزارت داخلہ نے کابل میں پیر کے دن کئے جانےوالے دہشت گردانہ بم دھماکے کی مذمت کی ہے۔
آوا خبر رساں ایجنسی کی رپورٹ کے مطابق افغانستان کی وزارت داخلہ نے ایک بیان جاری کرکے اس حملے میں ملوث عناصر کو افغان عوام کے ایسے جانی دشمن قرار دیا ہے جو سیکورٹی فورسز کا مقابلہ کرنے کی طاقت نہیں رکھتے ہیں۔
افغان وزارت داخلہ کے بیان میں آیا ہے کہ سیکورٹی فورسز کے ہاتھوں سنگین شکست کھانے والے افغان عوام کے دشمن اپنی شکستوں پر پردہ ڈالنے کے لئے اس طرح کے حملے کرتے اور بے گناہ لوگوں کو نشانہ بناتے ہیں اور یہ چیز بجائے خود ان کی شکست اور کمزوری کی علامت ہے۔
واضح رہے کہ پیر کے دن نیپالی سیکورٹی گارڈز کی منی بس کے راستے میں بم دھماکہ ہوا جس کے نتیجے میں چودہ افراد ہلاک اور آٹھ زخمی ہوگئے ۔
کابل کے پولیس چیف عبدالرحمان رحیمی نے کہا ہےکہ مارے جانے والوں میں افغان سیکورٹی فورس کے چند اہلکار بھی شامل ہیں۔
ابھی تک کسی گروہ نے اس حملے کی ذمےداری قبول نہیں کی ہے۔
