العیاضیہ، داعش دہشت گردوں کے وجود سے پاک
عراقی فورسز نے موصل اور تلعفر کی آزادی کے بعد العیاضیہ کو بھی داعش دہشت گردوں کے ناپاک وجود سے پاک کردیا ہے۔
المنار کی رپورٹ کے مطابق عراقی فورسز نے عراقی رضاکار دستوں اور عراقی پولیس کی مدد سے العیاضيہ علاقہ کو داعش کے وجود سے مکمل طور پر پاک کردیا ہے۔ داعش کو عراق میں تاریخی شکست اور ناکامی کا سامنا ہے۔
عراقی فوج اور عوامی رضاکار فورسز نے صوبے الانبار کے علاقے القائم میں آپریشن کرکے درجنوں خطرناک دہشت گردوں کو ہلاک یا زخمی کردیا ہے۔
دوسری جانب عراقی فوج نے درندہ صفت داعشی دہشت گردوں کے خلاف کارروائی کرتے ہوئے درجنوں دہشت گردوں کو ہلاک کردیا ہے۔
عراقی فوج نے صوبہ الانبار کے علاقے القائم میں دہشت گردوں کے خلاف ایک منفرد کارروائی کرکے ابوبکر البغدادی کے نائب ''ملا ہاشم فرحات'' سمیت 94 خطرناک دہشت گردوں کو ہلاک کردیا ہے۔
واضح رہے کہ صوبہ الانبار کے القائم، عنة اور راوة نامی علاقے تین سال سے داعش کے قبضے میں ہیں۔
عراقی فوج کا کہنا ہے کہ تلعفر کی آزادی کے بعد ان علاقوں کو بھی بہت جلد داعش کی چنگل سے آزاد کرا لئے جائیں گے۔
حشد الشعبی کے ترجمان احمد الاسدی کا کہنا ہے کہ تلعفر کی آزادی کے بعد الحویجہ سمیت صوبہ الانبار کو دہشت گردوں سے پاک کردیا جائے گا۔
واضح رہے کہ عراقی وزیراعظم حیدرالعبادی نے تلعفر کی داعشی دہشت گردوں سے مکمل طور پر آزادی کی مبارک باد دیتے ہوئے کہا تھا کہ ہم ملک بھر سے داعشی دہشت گردوں کا خاتمہ کریں گے، شام کی سرحد پر دہشت گردوں کی موجودگی کسی بھی صورت قابل قبول نہیں ہے۔
العبادی کا کہنا تھا کہ داعش کے پاس صرف دو ہی راستے ہیں، تسلیم یا موت۔
