حضرت امام حسن عسکری علیہ السلام کی شب ولادت باسعادت
فرزند رسولۖ حضرت امام حسن عسکری علیہ السلام کی شب ولادت باسعادت کے موقع پر پورے اسلامی جمہوریہ ایران میں جشن اور محافل میلاد کا سلسلہ جاری ہے۔
آسمان امامت و ولایت کے گیارہوں درخشاں ستارے فرزند رسولۖ اور شیعیان جہان کے گیارہویں امام حضرت امام حسن عسکری علیہ السلام کی شب ولادت باسعادت کے موقع پر ملک کی تمام اہم شاہراہوں اور عمارتوں کو خوبصورتی کے ساتھ سجایا گیا ہے اور چراغانی کی گئی ہے۔ بعض علاقوں میں لوگ سڑکوں پر مٹھائیاں اور شربت تقسیم کر کے حضرت امام حسن عسکری علیہ السلام سے اپنی والہانہ عقیدت و محبت کا اظہار کر رہے ہیں۔
مشہد المقدس میں فرزند رسول حضرت امام علی ابن موسی الرضا علیہ السلام کے روضے میں ہزاروں عقیدت مندوں کا اجتماع ہے اور محافل میلاد منعقد کی جا رہی ہیں۔
قم المقدسہ میں حضرت فاطمہ معصومہ سلام اللہ علیھا کے روضے میں بھی چراغانی کی گئی ہے اور محبان اہلبیت اطہار، جوق در جوق آپ کی بارگاہ میں حاضر ہو کر جشن کی محلفوں میں شریک ہو رہے ہیں۔
شیراز، رے اور تہران سمیت ایران کے تمام شہروں میں اہلبیت اطہار علیھم السلام کی برگزیدہ ہستیوں کے مقدس روضوں اور مختلف مساجد اور امام بارگاہوں میں بھی حضرت امام حسن عسکری علیہ السلام کی شب ولادت کے موقع پر جشن اور قصیدہ خوانی کا سلسلہ جاری ہے۔
محافل اور میلاد کا یہ سلسلہ ایران بھر میں بدھ کی رات دیر گئے تک جاری رہے گا۔
