کفر رمان میں شہید ہونے والے پانچ لبنانیوں کا جلوس جنازہ، نبطیہ میں عوام کا جم غفیر
جنوبی لبنان کے کفر رمان علاقے میں صیہونی فوج کے حملوں میں شہید ہونے والے پانچ شہدا کے جلوس جنازہ میں سیکڑوں افراد نے شرکت کی
سحرنیوز/عالم اسلام: ارنا کی رپورٹ کے مطابق شہر نبطیہ میں اتوار کو سیکڑوں لوگ اکٹھا ہوئے تاکہ پانچ لبنانیوں کے جلوس جنازہ میں شرکت کریں جو کفر رمان علاقے میں صیہونی فوج کے حملوں میں شہید ہوئے تھے۔
اس رپورٹ کے مطابق ان شہدا کے جنازے حزب اللہ کے زرد پرچم سے لپٹے ہوئے تھے اور نوجوان فوجی لباس میں ان کے ساتھ چل رہے تھے۔
جلوس جنازہ میں شریک افراد شہدا کے جنازوں پر پھول برسانے کے ساتھ ہی اسرائیل مردہ آباد، امریکہ مردہ آباد کے نعرے لگا رہے تھے اور صیہونی فوجیوں کے حالیہ حملوں پر اپنے غم و غصے کا اظہار کر رہے تھے۔ جنازے میں شریک بعض افراد اپنے ہاتھوں میں ان شہدا کی تصویریں اٹھائے ہوئے تھے جو صیہونی حکومت کے گزشتہ حملوں میں شہید ہوئے تھے۔
لبنان پر صیہونی حکومت کی فوج کے حملوں میں شہید ہونے والے ایک شہید کی ماں رعنا حامد نے فرانس نیوز ایجنسی کو انٹرویو دیتے ہوئے کہا کہ یہ وہ قیمت ہے جو جنوبی لبنان ہر روز ادا کر رہا ہے اور ہم برسوں سے جانتے ہیں کہ اسرائیل ہمارا دشمن ہے۔
