SAHAR

پاکستان اور ہندوستان کے حکام نے سرحدی علاقوں پر جنگ بندی کی خلاف ورزی کی روک تھام کے لئے ایک نئے ایجنڈے پر اتفاق کرلیا ہے۔

تسنیم خبر رساں ایجنسی کی رپورٹ کے مطابق پاکستان اور ہندوستان کے فوجی حکام کے درمیاں جمعہ کے دن نئی دہلی میں مذاکرات ہوئے۔ ان مذاکرات کا مقصد دو طرفہ تعلقات میں بہتری اور سرحدی کشیدگی کا خاتمہ بتایا جاتا ہے۔

اس رپورٹ کے مطابق پاکستانی اور ہندوستانی حکام کے درمیاں سرحدی کشیدگی کی روک تھام کے لئے ایک ایسا نیا ایجنڈہ طے پا گیا ہے جس کو عملی جامہ پہنایا جا سکتا ہے۔ اس ایجنڈے کی مزید تفصیلات بیان نہیں کی گئی ہیں۔ ہندوستان کی بارڈر سیکورٹی فورس کے ڈائریکٹر جنرل ڈی کے پتھک نے اس بارے میں کہا ہے کہ دونوں ملکوں کے فوجی حکام کے درمیان مذاکرات بہت خوشگوار ماحول میں ہوئے۔
 انہوں نے بتایا کہ مذاکرات کے دوران سرحدی کشیدگی کے علاوہ اسمگلنگ کے موضوع پر بھی تبادلہ خیال کیا گیا۔ واضح رہے کہ پاکستان اور ہندوستان کے درمیان سرحدی کشیدگی کی سب سے بڑی وجہ مسئلہ کشمیر ہے جس کو ان مذاکرات میں زیر بحث نہیں لایا گیا۔ پاکستانی فوجی حکام کا سولہ رکنی وفد گزشتہ ہفتے بدھ کے روز ہندوستانی بارڈر سیکورٹی فورس کے حکام کے ساتھ مذاکرات کے لئے نئی دہلی پہنچا تھا۔