SAHAR

پاکستانی حکومت نے نیشنل ایکشن پلان کے تحت جنوبی پنجاب میں دہشت گرد اور فرقہ پرست تنظیموں کے خلاف وسیع پیمانے پر کاروائیاں شروع کردی ہیں-

اخبار ایکسپریس ٹریبیون نے ایک اعلی حکومتی عہدیدار کے حوالے سے لکھا ہے کہ جنوبی پنجاب میں اس آپریشن کا دائرہ پھیلانے  اور اسے مزید موثر بنانے کا فیصلہ گزشتہ مہینے ہونے والے اعلی ترین سول و فوجی عہدیداروں  کے اجلاس میں کیا گیا۔ اپنی شناخت ظاہر نہ کرنے کی شرط پر اس عہدیدار نے آپریشن کی تفصیلات یہ کہہ کر نہیں بتائیں کہ اس سے حکومتی منصوبے کو نقصان پہنچ سکتا ہے۔جنوبی پنجاب میں فرقہ پرست تنظیموں کے خلاف آپریشن کا فیصلہ ان انٹیلی جنس رپورٹوں کے بعد کیا گیا ہے جن میں وارننگ دی گئی تھی کہ یہ علاقہ داعش جیسے گروہوں کی طاقتور نرسری بن سکتا ہے-

اس سینیئر حکومتی عہدیدار نے کہا کہ سیکورٹی ایجنسیوں نے حال ہی میں درجنوں ایسے مشتبہ افراد کو حراست میں لیا ہے جو ممکنہ طور پر داعش کیلیے نوجوانوں کو بھرتی کر رہے تھے۔ پاکستان اگرچہ اپنی سر زمین پر داعش کی موجودگی سے انکار کرتا ہے تاہم وہ یہ بھی تسلیم کرتا ہے کہ دہشت گرد گروپوں کے خطرے اور دھمکیوں سے غافل نہیں رہا جا سکتا ۔ فرقہ پرست تکفیری نظریات کی حامل  تنظیموں کے خلاف یہ آپریشن پاکستان کی پالیسی میں بڑی تبدیلی ہے کیونکہ ماضی میں ان کے خلاف کارروائی سے احترازکیا جاتا رہا ہے-