پاکستان اور چین کو مشترکہ چیلنجز کا سامنا
پاکستان کے آرمی چیف جنرل قمر جاوید باجوہ کا کہنا ہے کہ پاکستان اور چین کو مشترکہ چیلنجز کا سامنا ہے جنہیں مشترکہ کوششوں کے ذریعے شکست دی جا سکتی ہے۔
پاکستانی فوج کے شعبہ تعلقات عامہ (آئی ایس پی آر) کے مطابق اسلام آباد میں چین کی پیپلز لبریشن آرمی کے 90 ویں یوم تاسیس کے سلسلے میں منعقدہ خصوصی تقریب سے خطاب کرتے ہوئے آرمی چیف جنرل قمر جاوید باجوہ نے کہا کہ پاکستان اور چین اہم اسٹریٹیجک شراکت دار ہیں اور پاکستانی فوج کو چین کے ساتھ اپنی دوستی پر فخر ہے۔ انہوں نے امید ظاہر کی کہ پاکستانی فوج اور چین کی پیپلز لبریشن آرمی کے درمیان پیشہ ورانہ تعاون میں مزید اضافہ ہو گا۔
پاکستان کے آرمی چیف نے کہا کہ پیپلز لبریشن آرمی آج دنیا کی بہترین افواج میں سے ایک ہے، پاکستان چین دوستی زندگی کے تمام پہلوؤں سے متعلق ہے اور یہ دوستی ہر گزرتے دن کے ساتھ بڑھتی جا رہی ہے۔ جنرل قمر جاوید باجوہ نے کہا کہ پاک افغان تعلقات میں چین نے ہمیشہ پاکستان کے موقف کی تائید کی ہے، چین نے مسئلہ کشمیر، شنگھائی تعاون تنظیم کی رکنیت سمیت ہر معاملے پر پاکستان کا ساتھ دیا، عالمی فورمز پر پاکستان کی حمایت کرنے پر چین کے مشکور ہیں۔
تقریب میں شریک چینی سفیر سن وائی ڈونگ نے اپنے خطاب میں کہا کہ پاکستانی اور چینی افواج کے درمیان تعاون دونوں ممالک کے درمیان تعلقات کی بنیاد ہیں۔
