شہباز شریف کے دورہ سعودی عرب پر تحریک انصاف کی نکتہ چینی
وزارت عظمیٰ کا امیدوار نامزد ہونے کے بعد شہباز شریف کو سعودی حکام نے فوری پرسعودی عرب بلا لیا ہے۔
وزیراعلیٰ پنجاب شہباز شریف سعودی عرب کی جانب سے بھجوائے گئے خصوصی طیارے میں سعودی عرب پہنچ گئے ہیں۔ شہباز شریف سعودی عرب کے تین روزہ دورے میں سعودی حکام سے اہم ملاقاتیں کریں گے۔
تحریک انصاف نے وزیراعلیٰ پنجاب شہباز شریف کی خصوصی طیارے میں سعودی عرب روانگی پر تشویش کا اظہار کیا ہے ۔
ترجمان تحریک انصاف فواد چودھری نے کہا کہ قوم شہباز شریف کے دورے کے مقاصد سے آگاہی میں دلچسپی رکھتی ہے۔
ان کا مزید کہنا تھا کہ ماضی میں سعودی عرب نے پاکستانی سیاست میں اہم کردار ادا کیا ہے اور 2000 میں شریفوں کے این آر او کے لیے متحرک کردار ادا کیا۔ فواد چودھری نے امید ظاہر کی کہ سعودی حکام اس بار شریفوں کو جائے پناہ مہیا کرنے میں دلچسپی نہیں لیں گے۔
ادھر چیرمین تحریک انصاف عمران خان نے کہا کہ شریف برادران جہاں کہیں بھی جائیں اس بار انہیں این آر او نہیں ملے گا۔
