مشرف کاپاسپورٹ بحال کیا جائے، پاکستانی چیف جسٹس
سپریم کورٹ آف پاکستان نے سابق صدر پرویز مشرف کا پاسپورٹ بحال کرنے کا حکم دے دیا ہے۔
اسلام آباد سے موصولہ رپورٹ کے مطابق سپریم کورٹ نے نادرا کو حکم دیا ہے کہ سابق صدر پرویز مشرف کا بلاک شناختی کارڈ اور پاسپورٹ فوری طور پر بحال کردیا جائے۔
اس رپورٹ کے مطابق چیف جسٹس آف پاکستان میاں ثاقب نثارنے اسی کے ساتھ حکم دیا ہے کہ ایئر پورٹ سے عدالت تک سابق صدر پرویز مشرف کو گرفتار نہ کیا جائے۔
پرویز مشرف کی پاکستان واپسی کے معاملے پر سپریم کورٹ لاہور رجسٹری میں سماعت ہوئی۔
سپریم کورٹ نے پرویز مشرف کے ٹرائل کے لیے دو روز میں خصوصی عدالت قائم کرنے کا حکم دیا ہے ۔
چیف جسٹس آف پاکستان میاں ثاقب نثار کا کہنا ہے کہ مشرف واپس آئیں اور اپنے مقدمات کا سامنا کریں جس پر چیئرمین نادرا نے کہا کہ مشرف کی واپسی، شناختی کارڈ کے بلاک ہونے کی وجہ سے ممکن نہیں۔
چیف جسٹس نے کہا کہ کارڈ بلاک کرکے کیوں پرویز مشرف کی واپسی روکنے کا عذر پیدا کر رہے ہیں۔
عدالت عظمیٰ نے مشرف کے بلاک کارڈ اور پاسپورٹ کو کھولنے کے لیے نادرا کو حکم دیا۔
