SAHAR

میڈیا رپورٹوں کے مطابق لاہور ہائی کورٹ نے شہباز شریف کی عبوری درخواست ضمانت منظور کرتے ہوئے قومی احتساب بیورو کو حکم دیا ہے کہ وہ انہیں سترہ جون سے پہلے گرفتار نہ کرے۔

شہباز شریف نے دو روز قبل لاہور ہائی کورٹ میں درخواست جمع کرائی تھی کہ انہیں منی لانڈرنگ کیس میں نیب کی جانب سے اپنی گرفتاری کا خدشہ ہے، لہذا میری عبوری ضمانت منظور کی جائے۔

جسٹس طارق عباسی اور جسٹس فاروق حیدر پر مشتمل دو رکنی بینچ نے مختصر سماعت کے بعد شہباز شریف کی عبوری ضمانت کی منظوری دے دی۔ عدالتی فیصلے کے بعد کمرہ عدالت میں لیگی وکلاء کی جانب سے نعرے بازی کی گئی جس پر جسٹس طارق عباسی نے شدید برھمی کا اظہار کیا۔ انہوں نے کہا کہ جو عدالتی تقدس کا خیال نہیں کر رہے ہیں انہیں معلوم ہونا چاہیے کہ عدالت حکم واپس بھی لے سکتی ہے۔

یاد رہے کہ شہباز شریف کو گزشتہ روز آمدنی سے زائد اثاثہ جات کیس میں لاہور کی احتساب عدالت میں پیش ہونا تھا۔ ان کے عدالت میں حاضر نہ ہونے پر نیب کی ٹیم نے انہیں گرفتار کرنے کے لئے ان کے گھر پر چھاپہ بھی مارا تھا۔ شہباز شریف گھر پر موجود نہیں تھے جس کے بعد نیب کی ٹیم وہاں سے واپس لوٹ گئی تھی۔