ہندوستان ؛ اراکین پارلیمنٹ کی معطلی پر کانگریس کا احتجاج

Feb ۰۴, ۲۰۲۶ ۱۸:۱۰ Asia/Tehran

ہندوستانی پارلیمنٹ میں جاری تعطل کے درمیان کانگریس نے اپنے اراکین پارلیمنٹ کی معطلی اور لوک سبھا میں حزب اختلاف کے قائد راہل گاندھی کو بولنے سے روکے جانے پر شدید ردعمل ظاہر کیا ہے

سحرنیوز/ہندوستان: کانگریس پارٹی نے اسے جمہوریت پر براہ راست حملہ قرار دیتے ہوئے کہا ہے کہ حکومت اپوزیشن کی آواز دبانے کے لیے پارلیمانی روایات کو پامال کر رہی ہے۔

کانگریس کے مطابق لوک سبھا میں جب راہل گاندھی نے ملک کی خارجہ پالیسی اور چین سے متعلق امور پر اظہار خیال کرنا چاہا تو برسراقتدار جماعت کے اراکین نے ہنگامہ آرائی شروع کر دی۔ پارٹی نے الزام عائد کیا کہ ایوان چلا رہے کرشن پرساد تینیٹی نے قائد حزب اختلاف کو مکمل طور پر بولنے کا موقع نہیں دیا۔ اس صورت حال پر اعتراض ظاہر کرنے والے کانگریس اراکین کو پارلیمانی کارروائی سے معطل کر دیا گیا-

ہمیں فالو کریں:

گزشتہ روز اراکین کی معطلی کے بعد آج بھی کانگریس اور دیگر اپوزیشن جماعتوں کے رہنماؤں نے پارلیمنٹ کی سیڑھیوں اور مکر دوار کے قریب احتجاجی مظاہرہ کیا۔ مظاہرین نے ہاتھوں میں پوسٹر اٹھا رکھے تھے جن پر وزیر اعظم کے خلاف سخت نعرے درج تھے-

نیشنلسٹ کانگریس پارٹی (ایس پی) کے سربراہ شرد پوار نے نامہ نگاروں سے بات کرتے ہوئے لوک سبھا میں راہل گاندھی کو نہ بولنے دیئے جانے پر ردعمل ظاہر کرتے ہوئے کہا ہے کہ ان کو لوک سبھا میں بولنے دینا چاہئے تھا- اس سے پہلے سماج وادی پارٹی کی رکن پارلیمنٹ اقرا حسن نے بھی کہا تھا کہ ایسا لگتا ہے کہ اصول و ضوابط صرف اپوزیشن پر لاگو ہوتے ہیں-