پاکستان اور ہندوستان میں عاشورائے حسینی
پاکستان اور ہندوستان میں آج عاشورائے حسینی بڑے ہی عقیدت و احترام کے ساتھ منایا جا رہا ہے۔
یوم عاشور کے موقع پر پاکستان اور ہندوستان اور اسی طرح ان ملکوں کے زیر انتظام کشمیر میں سیکیورٹی کے سخت انتظامات کئے گئے ہیں۔
ہندوستان سے موصولہ اطلاعات کے مطابق مقبوضہ کشمیر میں پولیس اور سیکورٹی اہلکاروں نے جلوسہائے عزا پر حملہ کرکے کم از کم 40 عزاداروں کو زخمی کردیا اور کم از کم 200 نوجوانوں کو گھسیٹتے ہوئے گرفتار کرکے لے گئے۔
امام عالی مقام اور اُن کے وفادار ساتھیوں کی شہادت کا دن آج مذہبی عقیدت و احترام سے منایا جا رہا ہے۔ البتہ کورونا وائرس کی وجہ سے اس سال عاشورائے حسینی کے ماتمی جلوسوں اور مجالس میں طبی اصولوں پر خاص توجہ دی جا رہی ہے۔
عاشور کے موقع پر سکیورٹی کے سخت انتظامات کیے گئے ہیں ۔ پاکستان میں پولیس کے ساتھ فوج، رینجرز، ایف سی کے دستے بھی تعینات ہیں اور وہ جلوسوں کی فضائی نگرانی کر رہے ہیں۔ امن و امان کے تناظر میں پاکستان کے مختلف شہروں میں موبائل فون سروس معطل ہے ۔
کراچی، لاہور، پشاور اور کوئٹہ سمیت ملک کے بڑے شہروں میں موٹر سائیکل کی ڈبل سواری پر مکمل پابندی عائد ہے۔
سحرعالمی نیٹ ورک غم و اندوہ کے اس موقع پر اپنے تمام سامعین، ناظرین اورعزاداران حسینی کی خدمت میں تعزیت و تسلیت پیش کرتا ہے۔
