کراچی، اپوزیشن جماعتوں کے جلسے کی تیاریاں مکمل
پاکستان ڈیموکریٹک موومنٹ کا اجلاس آج اتوار کی شب کراچی میں ہو رہا ہے۔
کراچی میں پی ڈی ایم کے جلسے کے پیش نظر بعض سڑکوں کو بند کر دیا گیا ہے۔ اس رپورٹ کے مطابق جمشید روڈ اور تین ہٹی سے نمائش کی طرف جانے والے راستوں کو عام ٹریفک کے لئے بند کر دیا گیا ہے ۔ اسی کے ساتھ ناظم آباد اور تین ہٹی سے ٹریفک کو گرومندر جانے کی اجازت نہیں ہے ۔
رپورٹوں میں بتایا گیا ہے کہ پی ڈی ایم کے رہنما کراچی پہنچنا شروع ہوگئے ہیں اور اب تک پاکستان مسلم لیگ نون کی نائب صدر اور سابق وزیر اعظم میاں نواز شریف کی بیٹی مریم نواز اجلاس میں شرکت کے لئے کراچی پہنچ گئی ہیں جہاں ہوائی اڈے پر مسلم لیگ نون کے کارکنوں نے ان کا استقبال کیا۔
پاکستان ڈیموکریٹک موومنٹ کے سربراہ مولانا فضل الرحمان پہلے ہی کراچی پہنچ چکے ہیں۔ انہوں نے صحافیوں سے گفتگو میں کہا ہے کہ جمہوریت پسند قوتیں پی ڈی ایم کے پلیٹ فارم پر جمع ہو چکی ہیں، انہوں نے کہا کہ اب عوام کا سمندر کراچی، کوئٹہ، لاہور، ملتان اور پیشاور میں دیکھنے کو ملے گا۔
