SAHAR

پاکستان کے معروف سماجی کارکن عبدالستار ایدھی کی بیوہ، بلقیس ایدھی انتقال کرگئیں۔

بلقیس ایدھی، چوہتر سال کی عمر میں کراچی کے نجی اسپتال میں دوران علاج اس دنیا سے رخصت ہوئیں۔ وہ ایک مہینے سے زائد عرصے سے زیرعلاج تھیں۔ ایدھی فاؤنڈیشن کے ترجمان نے بتایا کہ بلقیس ایدھی عارضہ قلب سمیت متعدد امراض میں مبتلا تھیں۔

پاکستان کی سب سے بڑی سماجی تنظیم کے سربراہ عبدالستار ایدھی کے انتقال کے بعد بلقیس، ایدھی فاؤنڈیشن کی چیئر پرسن تھیں۔ وہ چودہ اگست انیس سو سینتالیس کو ہندوستان کی ریاست گجرات کے شہر بانٹوا میں پیدا ہوئی تھیں اور اس کے بعد اہل خانہ کے ساتھ پاکستان منتقل ہوگئی تھیں۔ سماجی خدمت کی بناپر انہیں ملک اور بیرون ملک متعدد ایوارڈ اور اعزازات سے نوازا گیا تھا۔