ورلڈ کپ کرکٹ میں آج ہندوستان اور ویسٹ انڈیز مد مقابل
کرکٹ ورلڈ کپ میں پاکستان نے نیوزی لینڈ کو 6 وکٹوں سے شکست دے دی۔
ورلڈکپ کرکٹ میں آج ہندوستان اور ویسٹ انڈیزکی ٹیمیں مد مقابل ہوں گی۔ جبکہ اس سے قبل کل کرکٹ ورلڈ کپ میں پاکستان نے نیوزی لینڈ کو 6 وکٹوں سے شکست دے کر سیمی فائنل کی راہ میں حائل ایک اور رکاوٹ عبور کرلی۔
ایونٹ کے اہم میچ میں گرین شرٹس نے ناقابل شکست بلیک کیپس کی جیت کے سلسلے کو بریک لگا کر فائنل فور کی جانب ایک اور قدم بڑھا دیا، نیوزی لینڈ کے 238 رنز کے جواب میں بابراعظم اور حارث سہیل نے 126 رنز کی قیمتی شراکت داری قائم کرکے ٹیم کو فتح سے ہمکنار کیا۔
بابراعظم نے شاندار بیٹنگ کرتے ہوئے سنچری اسکور کی اور ٹیم کی جیت میں کلیدی کردار ادا کیا جبکہ حارث سہیل نے بابر اعظم کا بھرپور ساتھ دیتے ہوئے 68 رنز کی بہترین اننگز کھیلی۔
بابراعظم نے 127 گیندوں پر 101 رنز کی ناقابل شکست اننگز کھیلی، ایونٹ میں کسی بھی پاکستانی بیٹسمین کی یہ پہلی سنچری تھی۔ بابر اعظم کو بہترین کارکردگی پر مین آف دی میچ قرار دیا گیا۔ محمد حفیظ 32 رنز بنا کر پویلین لوٹے۔
نیوزی لینڈ کی جانب سے بولٹ، فرگوسن اور کین ولیمسن نے ایک ایک وکٹ حاصل کی۔
اس سے قبل نیوزی لینڈ نے پاکستان کے خلاف ٹاس جیت کر بیٹنگ کا فیصلہ کیا تو اننگز کا آغاز مارٹن گپٹل اور کولن منرو نے کیا تاہم 5 کے مجموعی اسکور پر محمد عامر نے مارٹن گپٹل کو بولڈ کردیا جبکہ کچھ ہی دیر بعد شاہین آفریدی نے دوسرے اوپنر کولن منرو کو پویلین کی راہ دکھائی۔
شاہین آفریدی نے زبردست بولنگ کا مظاہرہ کیا اور چوتھے نمبر پر آنے والے راس ٹیلر کو بھی صرف 3 رنز پر آؤٹ کردیا، شاہین کی گیند پر سرفراز نے راس ٹیلر کا زبردست کیچ لیا جبکہ کچھ ہی دیر بعد شاہین آفریدی نے ٹام لیتھم کی وکٹ بھی حاصل کرلی۔
نیوزی لینڈ کے کپتان کین ولیمسن نے پاکستانی بولرز کے خلاف مزاحمت کی کوشش کی اور 41 رنز بنائے تاہم وہ شاداب خان کی گیند پر سرفراز احمد کے ہاتھوں کیچ آؤٹ ہوگئے۔ بعد ازاں جیمزنیشان اور کولن گرینڈ ہوم نے ذمہ دارنہ بلے بازی کا مظاہرہ کیا جس کے سبب نیوزی لینڈ کی ٹیم 200 سے زائد اسکور کرنے میں کامیاب رہی۔
دونوں آل راؤنڈرز نے نہ صرف اپنی نصف سنچریاں اسکور کیں بلکہ جیمز نیشان نے کیریئر کی بہترین اننگز بھی کھیلی، وہ 97 رن پر ناٹ آؤٹ رہے۔ گرینڈ ہوم 64 رنز کی اننگز کھیل کر رن آؤٹ ہوئے۔ پاکستانی ٹیم کی جانب سے شاہین آفریدی نے 3 جب کہ محمد عامر اور شاداب خان نے ایک ایک وکٹ حاصل کی۔
