بحیرہ روم میں گذشتہ ایک ہفتے کے دوران سات سو مہاجرین کی ہلاکت کا خدشہ
اقوام متحدہ کے ادارے برائے مہاجرین کا کہنا ہے کہ بحیرہ روم میں گزشتہ ایک ہفتے کے دوران تارکین وطن کی کشتیاں ڈوبنے کے باعث سات سو سے زائد افراد کی ہلاکت کا خدشہ ہے۔
فرانس کے چینل چوبیس کی رپورٹ کے مطابق اقوام متحدہ کے ادارے برائے مہاجرین کا کہنا ہے کہ سمندر کے راستے یورپ پہنچنے کی کوشش میں بحیرہ روم میں اٹلی کے ساحل کے قریب بدھ، جمعرات اور جمعہ کو تارکین وطن کی کشتیاں الٹنے کے نتیجے میں سات سو سے زائد افراد ڈوب گئے جن کی تلاش کا کام جاری ہے تاہم ان تمام افراد کے ہلاک ہونے کا خدشہ ظاہر کیا جارہا ہے اور یہ انتہائی خوفناک صورتحال ہے۔
دوسری جانب اطالوی کوسٹ گارڈ کا کہنا ہے کہ یہ تمام کشتیاں بدھ، جمعرات اور جمعہ کو سمندر میں ڈوبی تھیں جن میں ہزاروں افراد سوار تھے تاہم امدادی کاموں کے دوران پینتالیس افراد کی لاشیں ملی ہیں جب کہ صرف رواں ہفتے میں تیرہ ہزار کے قریب پناہ گزینوں کو ڈوبنے سے بچایا گیا ہے۔
واضح رہے کہ خانہ جنگی سے متاثرہ مشرق وسطیٰ کے ممالک سے اب تک لاکھوں افراد یورپی ممالک کی جانب ہجرت کرچکے ہیں جب کہ اس دوران سمندر کے راستے یورپ پہنچنے کی کوشش میں بچوں اورخواتین سمیت ہزاروں پناہ گزین سمندر میں ڈوب کر ہلاک ہوچکے ہیں۔
